സ്വന്തം ലേഖകന്‍
തിരുവനന്തപുരം: കഴിഞ്ഞ രണ്ടു പ്രളയങ്ങളിലും എല്ലാം നഷ്ടപ്പെട്ടവര്‍ ഭൂരിഭാഗവും സര്‍ക്കാര്‍ സഹായം കിട്ടാതെ തെരുവില്‍ കഴിയുമ്പോള്‍ ലോക കേരള സഭയുടെ പേരില്‍ സര്‍ക്കാര്‍ പൊട്ടിക്കുന്നത് കോടികള്‍. നിയമസഭാ മന്ദിരത്തില്‍ നടത്തുന്ന ലോക കേരള സഭയ്ക്ക് ഹൈടെക്ക് വേദി ഒരുക്കുകയാണ് സര്‍ക്കാര്‍. ജനുവരി 1, 2, 3 തിയതികളിലാണ് ലോക കേരള സഭ തിരുവനന്തപുരത്ത് കൂടുന്നത്.
ഇതിനായാണ് സൗകര്യമുണ്ടായിരുന്ന നിയമസഭ മന്ദിരത്തിലെ ശങ്കരനാരയാണന്‍ തമ്പി ഹാള്‍ പൊളിച്ച് 16 കോടി രൂപ ചെലവില്‍ അന്താരാഷ്ട്ര നിലവാരത്തില്‍ ഹൈടെക് വേദി ഒരുക്കുന്നത്. ഇതിന്റെ പണി പുരോഗമിക്കുന്നു. ഊരാളുങ്കല്‍ സൊസൈറ്റിക്കാണ് കരാര്‍. കോടികളുടെ പണിയായിട്ടും ടെന്‍ഡര്‍ നടപടികളില്ലാതെയാണ് ഊരാളുങ്കലിന് കരാര്‍ നല്‍കിയത്. നേരത്തെ പ്രതിപക്ഷ അംഗങ്ങള്‍ ലോക കേരള സഭയില്‍ നിന്നു രാജിവച്ചിരുന്നു.
കഴിഞ്ഞ വര്‍ഷം ആരംഭിച്ച ലോക കേരള സഭയുടെ രണ്ടാമത് സമ്മേളനം നടത്താന്‍ വേണ്ടിയാണ് കോടികള്‍ പൊട്ടിക്കുന്നത്. 2,000 ചതുരശ്ര അടി വിസ്തീര്‍ണമുള്ള വേദിയുടെ ഭാഗമായി വിദേശ വ്യവസായികള്‍ക്ക് വി.ഐ.പി ലോഞ്ചും ഒരുക്കുന്നുണ്ട്. ഹൈടെക്ക് വേദിയും ബാല്‍ക്കണിയും ഗ്രീന്റൂമും അടക്കമുള്ള സ്ഥിരം വേദിയാണ് പണി പൂര്‍ത്തിയായി കൊണ്ടിരിക്കുന്നത്. 662 സീറ്റാണ് സജ്ജീകരിക്കുന്നത്. 552 എണ്ണം പ്രധാന ഹാളിലും 110 എണ്ണം രണ്ട് ഭാഗങ്ങളിലെ ബാല്‍ക്കണിയിലുമാണ്. 1,850 ചതുരശ്ര അടി വിസ്തീര്‍ണമുള്ള വേദിയുടെ മൂന്ന് ഭാഗങ്ങളിലായി എല്‍.ഇ.ഡി വാളുമുണ്ട്. ഡിസംബര്‍ പകുതിയോടെ പണി പൂര്‍ത്തിയാകും.