തൊട്ടില്‍പ്പാലം: വേളം പുത്തലത്ത് യൂത്ത് ലീഗ് പ്രവര്‍ത്തകന്‍ നസീറുദ്ദീനെ കൊലപ്പെടുത്തിയ സംഭവത്തില്‍ ഒരാള്‍കൂടി അറസ്റ്റില്‍. എസ്.ഡി.പി.ഐ ഓളോടിത്താഴ യൂണിറ്റ് സെക്രട്ടറിയും പോപ്പുലര്‍ ഫ്രണ്ടണ്ട് കുറ്റ്യാടി ഏരിയ പ്രസിഡന്റുമായ ഒഴോടിത്താഴ ഒറ്റത്തെങ്ങുള്ളതില്‍ റഫീഖ് (35)ആണ് അറസ്റ്റിലായത്.
കുറ്റ്യാടി സി.ഐ എ സജീവന്റെ നേതൃത്വത്തിലുള്ള സംഘം ഇന്നലെ രാവിലെ 10 ന് കുറ്റ്യാടി ടൗണില്‍ വച്ചാണ് പ്രതിയെ അറസ്റ്റു ചെയ്തത്. പ്രതികളെ രക്ഷപ്പെടാന്‍ സഹായിച്ചതിനും കുറ്റംമറച്ചതിനുമാണ് കേസ്.
കഴിഞ്ഞ ജൂലൈ 16 നായിരുന്നു യൂത്ത്‌ലീഗ് പ്രവര്‍ത്തകന്‍ പുളിഞ്ഞോളി നസീറുദ്ദീനെ എസ്.ഡി.പി.ഐ അക്രമി സംഘം കുത്തിക്കൊലപ്പെടുത്തിയത്. തൊട്ടടുത്ത ദിവസം തന്നെ പൊലിസ് പ്രതികളെ അറസ്റ്റ് ചെയ്തിരുന്നു. കേസിലെ ഏഴ് പ്രതികളില്‍ റഫീഖ് ഉള്‍പ്പെടെ അഞ്ചുപ്രതികള്‍ റിമാന്റിലാണ്. നാലാം പ്രതി മുഹമ്മദ് വിദേശത്തേക്ക് കടന്നുവെന്നും ഇയാളെ വിട്ടുകിട്ടാനുള്ള നിയമനടപടി സ്വീകരിച്ചതായും പൊലിസ് പറഞ്ഞു. അവശേഷിക്കുന്നയാള്‍ നാട്ടില്‍ത്തന്നെ ഉണ്ടെണ്ടന്നും ഇയാളെ ഉടന്‍ അറസ്റ്റുചെയ്യുമെന്നും പൊലിസ് പറഞ്ഞു.