തിരുവനന്തപുരം: കേരള കോണ്‍ഗ്രസ് എം നിയമസഭാകക്ഷി നേതാവായി പി.ജെ ജോസഫിനേയും ഉപനേതാവായി സി.എഫ് തോമസിനെയും തെരഞ്ഞെടുത്തു. മോന്‍സ് ജോസഫാണ് വിപ്പും സെക്രട്ടറിയും. ജോസ് കെ മാണിയെ പാര്‍ട്ടി ചെയര്‍മാനാക്കിയ നടപടി കോടതി സ്റ്റേ ചെയ്ത സാഹചര്യത്തിലാണ് പുതിയ തീരുമാനമെന്ന് പി.ജെ ജോസഫ് അറിയിച്ചു. വര്‍ക്കിങ് ചെയര്‍മാനു തന്നെയാണ് പാര്‍ട്ടി ചെയര്‍മാന്റെ സ്ഥാനമെന്നും അദ്ദേഹം ആവര്‍ത്തിച്ചു.

അഞ്ചു പേരില്‍ മൂന്നു പേര്‍ കമ്മിറ്റിയില്‍ പങ്കെടുത്തു. കട്ടപ്പന സബ് കോടതിയുടെ വിധി വരട്ടെ എന്നു പറഞ്ഞാണ്
ഇതുവരെ നിയമസഭാ കക്ഷി നേതാവിനെ തെരഞ്ഞെടുക്കാഞ്ഞത്. ഇന്ന് വിധി വന്നിട്ടും കമ്മിറ്റിയില്‍ പങ്കെടുക്കാന്‍ ജോസ് കെ മാണിപക്ഷം തയ്യാറായില്ല. അവരെ കമ്മിറ്റിയുണ്ടെന്ന് അറിയിച്ചതാണെന്നും എന്നാല്‍ അവര്‍ വ്യക്തിപരമായ കാരണങ്ങളാല്‍ വരാന്‍ കഴിയില്ലെന്ന് അറിയിച്ചതായും പി.ജെ ജോസഫ് വാര്‍ത്താസമ്മേളനത്തില്‍ പറഞ്ഞു.

തന്നെപ്പറ്റി ജോസ് കെ മാണി കള്ളം പ്രചരിപ്പിക്കുകയാണെന്നും ജോസഫ് ആരോപിച്ചു. കേരള കോണ്‍ഗ്രസ് എമ്മിലെ തര്‍ക്കവുമായി ബന്ധപ്പെട്ട് കട്ടപ്പന സബ് കോടതി വിധി പി.ജെ ജോസഫിന് തിരിച്ചടിയായെന്നും കോടതിവിധിയെ ജോസഫ് തെറ്റായി വ്യാഖ്യാനിക്കുകയാണെന്നും ജോസ് കെ മാണി ആരോപിച്ചിരുന്നു. പിജെ ജോസഫിനു പുറമേ സി എഫ് തോമസും മോന്‍സ് ജോസഫും വാര്‍ത്താ സമ്മേളനത്തില്‍ പങ്കെടുത്തു.