നിയമ പരിരക്ഷ ഉപയോഗിച്ച് സഹപ്രവര്‍ത്തകരെയടക്കം പീഡിപ്പിക്കുന്നവരുടെ അന്ത്യത്തിന്റെ ജീവിക്കുന്ന അടയാളമായി കല്‍ക്കത്ത ഹൈക്കോടതി മുന്‍ ജഡ്ജി ജസ്റ്റീസ് സി.എസ് കര്‍ണന്‍. പട്ടികജാതി -വര്‍ഗക്കാര്‍ക്കെതിരായ പീഡനങ്ങളും ആക്രമണങ്ങളും തടയുന്നതിനുള്ള നിയമം മറയാക്കി അദ്ദേഹം സഹപ്രവര്‍ത്തകരെ മാത്രമല്ല മേലധികാരികളെയും ഭീഷണിപ്പെടുത്തി സ്വന്തം കാര്യങ്ങള്‍ സാധിച്ചെടുത്തു. അദ്ദേഹം പീഡിപ്പിച്ചവരില്‍ പട്ടികജാതിക്കാരായ ജഡ്ജിമാരും ഉണ്ടായിരുന്നു എന്നു കാണുമ്പോഴാണു നിയമവും അധികാരവും പഴുതുകളാക്കി ചിലര്‍ സാമൂഹിക വിരുദ്ധരായി അഴിഞ്ഞാടുന്നതിന്റെ നേര്‍ക്കാഴ്ചകള്‍ കാണേണ്ടിവരുന്നത്. 

പട്ടികജാതിക്കാര്‍ക്കും സ്ത്രീകള്‍ക്കും ഒക്കെ പകര്‍ന്നിട്ടുള്ള നിയമപരമായ പരിരക്ഷ ഇന്നു പലരെയും പീഡിപ്പിക്കുന്നതിനുള്ള ആയുധമാക്കുകയാണ് അറിവുള്ള അഹങ്കാരികള്‍. കര്‍ണന്‍ ഒറ്റപ്പെട്ട വ്യക്തിയല്ല. എല്ലായിടത്തുമുണ്ട് നിയമവും സംവിധാനങ്ങളും സ്വന്തം കാര്യത്തിനായി വ്യാഖ്യാനിച്ചു മറ്റുള്ളവരെ പീഡിപ്പിച്ചു രസിക്കുന്നവര്‍.
മദ്രാസ് ഹൈക്കോടതിയില്‍ 2009 മുതല്‍ 16 വരെ ഉണ്ടായിരുന്ന ചീഫ് ജസ്റ്റിസുമാരെയും ജസ്റ്റിസുമാരെയും വിറപ്പിച്ചു ജീവിച്ച ജസ്റ്റീസ് കര്‍ണന് ഒളിവിലിരുന്ന് ഔദ്യോഗിക ജീവിതം അവസാനിപ്പിക്കേണ്ടി വരികയും കോടതിയലക്ഷ്യത്തിനു ജയിലിലെത്തേണ്ടിവരികയും ചെയ്തു. അക്കാലഘട്ടത്തില്‍ അദ്ദേഹത്തിന്റെ പീഡനത്തിനിരയായവരെല്ലാം ഇന്ന് ആഹ്ലാദിക്കുകയാവും.
പുറത്തുനിന്ന് വീക്ഷിക്കുന്നവര്‍ക്ക് തന്റേടിയായ ജഡ്ജിയെന്നേ തോന്നാറുള്ളൂവെങ്കിലും അദ്ദേഹത്തിന്റെ ചരിത്രം നല്‍കുന്നത് അത്ര ഗുണകരമായ വാര്‍ത്തകളല്ല. ഏതായാലും സത്യമേ വ ജയതേ.... നമുക്ക് ആശ്വസിക്കാം.