തിരുവനന്തപുരം: ബി.ജെ.പി നേതാവ് കുമ്മനം രാജശേഖരന് മാലയിട്ട് ഉമ്മനല്‍കിയതിനെ തുടര്‍ന്ന് തിരുവനന്തപുരത്ത് സംഘടിപ്പിച്ച സാംസ്‌കാരിക പരിപാടിയില്‍ നിന്ന് നോവലിസ്റ്റ് ഡോ. ജോര്‍ജ് ഓണക്കൂറിനെ ഒഴിവാക്കി.
വാളയാര്‍ സംഭവത്തില്‍ കുമ്മനം രാജശേഖരന്റെ ഉപവാസസമരം ഉദ്ഘാടനം ചെയ്ത ഓണക്കൂറിനൊപ്പം വേദി പങ്കിടില്ലെന്ന് എഴുത്തുകാരി സി.എസ് ചന്ദ്രിക നിലപാട് എടുത്തതിനെത്തുടര്‍ന്നാണ് ഒഴിവാക്കല്‍.
വാളയാര്‍ പെണ്‍കുട്ടികള്‍ക്ക് നീതി തേടി ഇന്നലെ സെക്രട്ടേറിയറ്റ് പടിക്കല്‍ കുമ്മനം രാജശേഖരന്റെ ഉപവാസം ഉദ്ഘാടനം ചെയ്തത് ജോര്‍ജ് ഓണക്കൂറായിരുന്നു. കുമ്മനത്തെ ഉമ്മ കൊടുത്ത് ഹാരമിട്ടാണ് ഓണക്കൂര്‍ അനുമോദിച്ചത്.
ഓണക്കൂറിന്റെ നിലപാടിനെതിരെ രൂക്ഷ വിമര്‍ശനവുമായി എഴുത്തുകാരി സി.എസ് ചന്ദ്രിക രംഗത്തെത്തി. മുസ്‌ലിം അരും കൊലകളുടെ ദുര്‍ഗന്ധം പേറുന്ന ഹിന്ദുത്വ ഫാസിസത്തിന്റെ മുഖത്ത് ഒരു എഴുത്തുകാരന്‍ സ്‌നേഹപൂര്‍വം പരസ്യമായി നല്‍കിയ ഈ രാഷ്ട്രീയ ചുംബനം തന്നെ ഭയപ്പെടുത്തുന്നുവെന്നും ചന്ദ്രിക ഫെയ്‌സ് ബുക്കില്‍ കുറിച്ചു.
ഇന്നലെ വൈകിട്ട് ഇരുവരും പങ്കെടുക്കേണ്ടിയിരുന്ന തനിമ കലാസാഹിത്യവേദിയുടെ പരിപാടിയില്‍ നിന്ന് പിന്മാറുകയാണെന്നും ചന്ദ്രിക വ്യക്തമാക്കി. തുടര്‍ന്നാണ് സംഘാടകര്‍ ജോര്‍ജ് ഓണക്കൂറിനെ ഒഴിവാക്കിയത്. ഓണക്കൂറിനെ ഒഴിവാക്കിയതായി അറിയിച്ചതിനേത്തുടര്‍ന്ന് ചന്ദ്രിക പരിപാടിയില്‍ പങ്കെടുത്തു. വ്യക്തിപരമായ അസൗകര്യങ്ങളേത്തുടര്‍ന്നാണ് ഓണക്കൂര്‍ വരാതിരുന്നതെന്നാണ് സംഘാടകരുടെ ഔദ്യോഗിക വിശദീകരണം.