കാളികാവ്: സംസ്ഥാനത്തെ ഇടതുപക്ഷ സര്‍ക്കാരിനെതിരേ രൂക്ഷവിമര്‍ശനവുമായി മാവോയിസ്റ്റുകള്‍ രംഗത്ത്. കമ്മ്യൂണിസ്റ്റ് വിപ്ലവകാരികളെ കൊന്നുതള്ളുന്നതില്‍ ഇടതുസര്‍ക്കാര്‍ റെക്കോര്‍ഡ് സൃഷ്ടിച്ചിരിക്കുകയാണെന്ന് സി.പി.ഐ (മാവോയിസ്റ്റ് ) പശ്ചിമഘട്ട പ്രത്യേക മേഖല കമ്മിറ്റി വക്താവ് ജോഗി പ്രസ്താവനയില്‍ പറഞ്ഞു.
ജാതി ജന്മിത്വത്തിന്റെയും മുതലാളിത്ത ഉദ്യോഗസ്ഥന്‍മാരുടെ ചൂഷണത്തില്‍നിന്നും അടിമത്വത്തില്‍നിന്നും മോചിപ്പിക്കാനാണ് മാവോയിസ്റ്റുകള്‍ ശ്രമിക്കുന്നത്.
മൂന്നുവര്‍ഷത്തിനിടയില്‍ നിലമ്പൂര്‍ പടുക്കയിലും വയനാട് വൈത്തിരിയിലും അട്ടപ്പാടി മഞ്ചക്കട്ടിയിലും സര്‍ക്കാര്‍ മാവോയിസ്റ്റുകള്‍ക്കെതിരേ നടത്തിയത് ആസൂത്രിത കൊലപാതകമാണെന്നും പ്രസ്താവനയില്‍ പറയുന്നുണ്ട്.
പ്രസ്താവന ലഘുലേഖയാക്കി വിതരണം ചെയ്തിട്ടുണ്ട്. സംസ്ഥാനത്ത് തണ്ടര്‍ബോള്‍ട്ട് നടത്തിയ വ്യാജ ഏറ്റുമുട്ടല്‍ കൊലപാതകങ്ങള്‍ക്കെതിരേ തിരിച്ചടിക്കുമെന്നും പ്രസ്താവനയിലുണ്ട്. കൊലയാളികളായ ഉദ്യോഗസ്ഥരെയും മാര്‍ഗ നിര്‍ദേശം നല്‍കുന്നവര്‍ ഉള്‍പ്പടെയുള്ളവര്‍ക്കെതിരേ തിരിച്ചടിക്കാന്‍ ജനകീയ സഹായവും അഭ്യര്‍ഥിച്ചിട്ടുണ്ട്.
അട്ടപ്പാടി മേലേ മഞ്ചക്കട്ടി വനത്തില്‍ വെടിയേറ്റ് മരിച്ച നാലുപേരും ഭവാനി ദളത്തിന്‍ കീഴിലെ ജനകീയ വിമോചന ഗറില്ലാ സേന (പി.എല്‍.ജി.എ) അംഗങ്ങളാണ്. മാവോയിസ്റ്റ് വേട്ടയുടെ കാര്യത്തില്‍ സി.പി.എമ്മും ബി.ജെ.പിയും ഒരു പോലെയാണ്. മാവോയിസ്റ്റുകളെ ഉന്മൂലനം ചെയ്യാനുള്ള കേന്ദ്രസര്‍ക്കാര്‍ പദ്ധതിയാണ് സി.പി.എം സര്‍ക്കാര്‍ ഏറ്റെടുത്ത് നടത്തുന്നതെന്നും ജോഗി കുറ്റപ്പെടുത്തി.
മാവോയിസ്റ്റുകളെ പിന്തുണക്കുന്ന സി.പി.ഐക്കെതിരേയും പ്രസ്താവനയില്‍ വിമര്‍ശിക്കുന്നുണ്ട്.
ഇരയോടൊപ്പം നില്‍ക്കുകയും വേട്ടക്കാരനോടൊപ്പം ഓടുകയും ചെയ്യുന്ന നയമാണ് സി.പി.ഐയുടേത്. മാവോയിസ്റ്റ് വേട്ട സര്‍ക്കാരിന്റെ നയമല്ലെങ്കില്‍ പിണറായി വിജയന്റെ വ്യക്തിപരമായ നയമാണോയെന്ന് വ്യക്തമാക്കാന്‍ സി.പി.ഐ തയാറാവണമെന്നും പ്രസ്താവനയില്‍ പറയുന്നു.
സര്‍ക്കാരിനെതിരേ ജനകീയ വികാരം ഇളക്കിവിടാനും ലക്ഷ്യമിടുന്നുണ്ട്.
ഏറ്റുമുട്ടല്‍ ആവര്‍ത്തിച്ചതോടെ മാവോയിസ്റ്റ് ഭീഷണി പൊലിസും ഭയക്കുന്നുണ്ട്. മലയോര മേഖലയിലെ പൊലിസുകാര്‍ തിരിച്ചടി സാധ്യത മുന്‍നിര്‍ത്തി വളരെ കരുതലോടെയാണ് നീങ്ങുന്നത്.