ബ്രസല്‍സ്: സ്വന്തം താല്‍പര്യം മുന്‍നിര്‍ത്തി തെരച്ചില്‍ വിവരങ്ങള്‍ ഉപഭോക്താക്കള്‍ക്ക് നല്‍കിയ ഗൂഗിളിനെതിരേ യൂറോപ്യന്‍ കമ്മിഷന്‍ 2.42 ബില്യന്‍ യൂറോ (2.7 ബില്യന്‍ ഡോളര്‍) പിഴ ചുമത്തി. ലോകത്തെ ഏറ്റവും വലിയ സെര്‍ച്ച് എന്‍ജിനായ ഗൂഗിളിന് ഇതാദ്യമായാണ് ഇത്തരത്തില്‍ പിഴ ചുമത്തപ്പെടുന്നത്.
കമ്പനിയുടെ താല്‍പര്യം മാത്രം മുന്‍നിര്‍ത്തി അത്തരം സൈറ്റുകളുടെ വിവരങ്ങളാണ് സെര്‍ച്ച് എന്‍ജിന്‍ നല്‍കിയതെന്ന് യൂറോപ്യന്‍ കമ്മിഷന്‍ പറഞ്ഞു. ഇത്തരം നടപടികളില്‍ നിന്ന് ഗൂഗിള്‍ 90 ദിവസത്തിനകം പിന്തിരിയണമെന്നും അല്ലെങ്കില്‍ കൂടുതല്‍ പിഴ ചുമത്തുമെന്നും ഉത്തരവില്‍ പറയുന്നു. സെര്‍ച്ച് എന്‍ജിനായ കമ്പനി അവരുടെ അധികാരം ദുരുപയോഗപ്പെടുത്തി സ്വന്തം താല്‍പര്യപ്രകാരം ആളുകളെ സ്വാധീനിക്കുകയായിരുന്നു.
അമേരിക്ക ആസ്ഥാനമായി പ്രവര്‍ത്തിക്കുന്ന കമ്പനിയാണ് ഗൂഗിള്‍.
നടപടിക്കെതിരേ അപ്പീല്‍ നല്‍കുമെന്ന് കമ്പനി അറിയിച്ചു. ഓണ്‍ലൈന്‍ ഷോപ്പിങ് നടത്തുന്നതിനും മറ്റും ആളുകള്‍ തെരച്ചില്‍ നടത്തുമ്പോഴാണ് കമ്പനിക്ക് താല്‍പര്യമുള്ളവരുടെ വിവരം മാത്രം പ്രദര്‍ശിപ്പിക്കുന്നത്.
കമ്പനി അക്ഷരമാല ക്രമത്തില്‍ സൈറ്റ് വിലാസം നല്‍കുന്നില്ലെന്നും യൂറോപ്യന്‍ കമ്മിഷന്‍ പറഞ്ഞു. ഏറ്റവും പുതിയ സാമ്പത്തിക റിപ്പോര്‍ട്ട് പ്രകാരം പ്രതിദിനം 1.4 കോടി ഡോളറിന്റെ വരുമാനമാണ് ഗൂഗിള്‍ ഉണ്ടാക്കുന്നത്.ഷോപ്പിങ് തെരച്ചിലിനു വേണ്ടി ഏതുവിധത്തിലുള്ള മാറ്റം വരുത്താമെന്ന് ഗൂഗിളിന് തീരുമാനിക്കാം.
യൂറോപ്യന്‍ യൂനിയന്റെ വിശ്വാസഹത്യാ ചട്ട പ്രകാരം ഗൂഗിള്‍ ചെയ്തത് നിയമവിരുദ്ധ നടപടിയാണെന്ന് യൂറോപ്യന്‍ യൂനിയന്‍സ് കോംപെറ്റീഷന്‍ കമ്മിഷനര്‍ മാര്‍ഗറെത് വെസ്താഗര്‍ പറഞ്ഞു. ഷോപ്പിങ് സൈറ്റുകള്‍ തെരയുമ്പോള്‍ ഗൂഗിള്‍ ആമസോണിനും ഇ-ബേക്കുമാണ് മുന്‍തൂക്കം നല്‍കുന്നത്.
എന്നാല്‍ എത്രയും പെട്ടെന്നും എളുപ്പത്തില്‍ തെരച്ചില്‍ വിവരങ്ങള്‍ നല്‍കാനാണ് ഇങ്ങനെ ചെയ്യുന്നതെന്ന് ഉത്തരവിനോട് പ്രതികരിക്കവെ ഗൂഗിള്‍ വക്താവ് പ്രസ്താവനയില്‍ പറഞ്ഞു. പരസ്യക്കാരുടെ താല്‍പര്യവും തെരച്ചില്‍ വിവരം നല്‍കുന്നതില്‍ മുന്‍തൂക്കം നല്‍കാനുണ്ടെന്നും തങ്ങളുടെ ഉപഭോക്താക്കള്‍ക്കിടയില്‍ വ്യാപാരം കൂട്ടാനാണ് അവര്‍ പരസ്യം നല്‍കുന്നതെന്നും പ്രസ്താവന പറയുന്നു.