മുംബൈ: മുഖ്യമന്ത്രി സ്ഥാനത്തെ ചൊല്ലി സര്‍ക്കാര്‍  രൂപവല്‍കരണം പ്രതിസന്ധിയിലായ മഹാരാഷ്ട്രയില്‍ ശിവസേനയുമായുള്ള സഖ്യത്തിനില്ലെന്ന് എന്‍.സി.പി അധ്യക്ഷന്‍ ശരത് പവാര്‍ വ്യക്തമാക്കി.ശിവസേനയുമായി സഖ്യത്തിലേര്‍പ്പെട്ട് മഹാരാഷ്ട്രയില്‍ സര്‍ക്കാരുണ്ടാക്കാന്‍ എന്‍.സി.പിയില്ലെന്നും പ്രതിപക്ഷത്തിരിക്കാനാണ് പാര്‍ട്ടിയുടെ തീരുമാനമെന്നും പവാര്‍ പറഞ്ഞു.

നാലു വര്‍ഷം മഹാരാഷ്ട്രയുടെ മുഖ്യമന്ത്രിയായ തനിക്ക് വീണ്ടും പദവിയിലെത്താന്‍ താല്‍പര്യമില്ല. എന്‍.സി.പിക്കാണ് ഭൂരിപക്ഷം ലഭിച്ചതെങ്കില്‍ തങ്ങള്‍ സര്‍ക്കാര്‍ ഉണ്ടാകിയേനെ എന്ന് മുംബൈയില്‍ വാര്‍ത്താ സമ്മേളനത്തില്‍ അദ്ദേഹം പറഞ്ഞു.

ബി.ജെ.പിശിവസേന സഖ്യം മഹാരാഷ്ട്രയില്‍ സര്‍ക്കാരുണ്ടാക്കണം. ജനവിധി അവര്‍ക്കനുകൂലമായിരുന്നു. 25 വര്‍ഷമായി ഇരുപാര്‍ട്ടികളും സഖ്യം തുടരുകയാണ്. അതിനാല്‍ ജനവിധി മാനിച്ച് ഭരണഘടനാ പ്രതിസന്ധി സൃഷ്ടിക്കാതെ സര്‍ക്കാരുണ്ടാക്കാന്‍ ഇരുപാര്‍ട്ടികളും ചേര്‍ന്നുള്ള മുന്നണി തയാറാകണമെന്ന് അദ്ദേഹം ആവശ്യപ്പെട്ടു.

മഹാരാഷ്ട്രയിലെ തര്‍ക്കത്തില്‍ പ്രത്യക്ഷമായി ഇടപെടാതിരുന്ന അമിത് ഷായെയും വാര്‍ത്താ സമ്മേളനത്തിനിടെ പവാര്‍ വിമര്‍ശിച്ചു. ബി.ജെ.പിക്ക് മതിയായ സീറ്റുകള്‍ ലഭിക്കാത്ത സംസ്ഥാനങ്ങളില്‍ പോലും സര്‍ക്കാറുണ്ടാക്കുന്നതില്‍ പേരുകേട്ട വ്യക്തിയാണ് അമിത് ഷാ. മഹാരാഷ്ട്രയും അദ്ദേഹത്തിന്റെ വൈദഗ്ധ്യം കാണാന്‍ പോകുന്നേയുള്ളൂയെന്ന് പവാര്‍ പറഞ്ഞു.