പരസ്യബോര്‍ഡ് നീക്കം ചെയ്യുന്നതിന്റെ ചെലവും ഫൈനും ഈടാക്കും
തിരുവനന്തപുരം: ഗ്രാമപഞ്ചായത്ത് പ്രദേശത്ത് പൊതുനിരത്തുകളില്‍ അനധികൃത പരസ്യബോര്‍ഡുകള്‍, ഹോര്‍ഡിങ്ങുകള്‍, ബാനറുകള്‍, കൊടികള്‍ എന്നിവ സ്ഥാപിക്കുന്നത് കര്‍ശനമായി നിരോധിക്കാനും ലംഘിക്കുന്നവര്‍ക്കെതിരേ നിയമ നടപടി സ്വീകരിക്കാനും പഞ്ചായത്ത് വകുപ്പ് നിര്‍ദേശം നല്‍കി. ഗ്രാമപഞ്ചായത്ത് പ്രദേശങ്ങളിലെ പൊതുനിരത്തുകളില്‍ അനധികൃതമായും അപകടകരമായും സ്ഥാപിച്ചിരുന്ന പരസ്യബോര്‍ഡുകള്‍ നീക്കം ചെയ്തിരുന്നെങ്കിലും വീണ്ടും സ്ഥാപിക്കുന്നതായി ശ്രദ്ധയില്‍പെട്ടതിനെ തുടര്‍ന്നാണ് നിര്‍ദേശം.
ബോര്‍ഡുകള്‍ വീണ്ടും സ്ഥാപിച്ചിട്ടുണ്ടെങ്കില്‍ ഗ്രാമപഞ്ചായത്ത് സെക്രട്ടറിമാര്‍ അവ നീക്കം ചെയ്ത ശേഷം വിശദാംശങ്ങള്‍ ബന്ധപ്പെട്ട പൊലിസ് സ്‌റ്റേഷന്‍ എസ്.എച്ച്.ഒയെ അറിയിക്കണം. പരസ്യബോര്‍ഡ് നീക്കം ചെയ്യുന്നതിന്റെ ചെലവും ഫൈനും ബന്ധപ്പെട്ടവരില്‍ നിന്ന് നിയമാനുസൃതം ഈടാക്കണം. ഇവ നീക്കം ചെയ്തതിന്റെ വസ്തുതാ റിപ്പോര്‍ട്ട് പഞ്ചായത്ത് ഡെപ്യൂട്ടി ഡയരക്ടറെ 29ന് വൈകുന്നേരം മൂന്നിനകം അറിയിക്കണമെന്നും അനധികൃതമായും അപകടകരമായും ബോര്‍ഡുകളും ഹോര്‍ഡിങ്ങുകളും സ്ഥാപിച്ചിട്ടില്ലെന്ന് പഞ്ചായത്ത് സെക്രട്ടറിമാര്‍ നേരിട്ട് പരിശോധിച്ച് ഉറപ്പ് വരുത്തണമെന്നും ഉത്തരവില്‍ പറയുന്നു.
പെര്‍ഫോമന്‍സ് ഓഡിറ്റ് സൂപ്പര്‍വൈസര്‍മാരും അനധികൃത ബോര്‍ഡുകള്‍ സംബന്ധിച്ച് പരിശോധന നടത്തി വിവരം പഞ്ചായത്ത് ഡെപ്യൂട്ടി ഡയരക്ടറെ അറിയിക്കണം. അനധികൃത ബോര്‍ഡുകള്‍ നീക്കം ചെയ്യുന്നതിന് നിയമിച്ചിട്ടുള്ള ജില്ലാതല നോഡല്‍ ഓഫിസര്‍മാര്‍ പഞ്ചായത്ത് ഡെപ്യൂട്ടി ഡയരക്ടര്‍മാര്‍ മുഖേന ഗ്രാമപഞ്ചായത്ത് സെക്രട്ടറിമാര്‍ക്ക് നിര്‍ദേശം നല്‍കണം. ഇവ പൂര്‍ണമായി നീക്കം ചെയ്തിട്ടുണ്ടെന്ന് പഞ്ചായത്ത് ഡെപ്യൂട്ടി ഡയരക്ടര്‍മാര്‍ പരിശോധിച്ച് ഉറപ്പുവരുത്താനും മാര്‍ഗനിര്‍ദേശങ്ങള്‍ പുറപ്പെടുവിക്കാനും നിര്‍ദേശിച്ചിട്ടുണ്ട്. പഞ്ചായത്ത് പരിധിയിലെ പൊതുനിരത്തുകളില്‍ ഹോര്‍ഡിങ്ങുകളും ബാനറുകളും സ്ഥാപിക്കാന്‍ അനുമതി നല്‍കുമ്പോള്‍ മാര്‍ഗനിര്‍ദേശങ്ങള്‍ കര്‍ശനമായി പാലിക്കുകയും വേണം.