തിരുവനന്തപുരം: ശബരിമലയുമായി ബന്ധപ്പെട്ട സര്‍ക്കാര്‍ നടപടിയില്‍ പ്രതിഷേധിച്ച് മൂന്നംഗങ്ങള്‍ കറുത്ത ഷര്‍ട്ട് ധരിച്ച് സഭയിലെത്തി. പി.സി ജോര്‍ജ്, ബി.ജെ.പി അംഗം ഒ.രാജഗോപാല്‍, കേരളാ കോണ്‍ഗ്രസ് പ്രതിനിധി റോഷി അഗസ്റ്റിന്‍ എന്നിവരാണ് കറുത്ത ഷര്‍ട്ട് ധരിച്ചെത്തിയത്. അടിയന്തര പ്രമേയത്തില്‍ ഒ.രാജഗോപാലിന് സംസാരിക്കാന്‍ അവസരം നല്‍കിയെങ്കിലും ബഹളത്തിനിടയില്‍ ആരും കേട്ടില്ല. പി.സി ജോര്‍ജ് സംസാരിക്കാന്‍ അവസരം ചോദിച്ചെങ്കിലും സ്പീക്കര്‍ അവസരം നിഷേധിച്ചു.
വിശ്വാസ സംരക്ഷണത്തിനായാണ് സഭയില്‍ കറുപ്പണിഞ്ഞ് വന്നതെന്ന് പി.സി ജോര്‍ജ് സഭയിലെത്തുന്നതിനു മുന്‍പ് മാധ്യമപ്രവര്‍ത്തകരോട് പറഞ്ഞു. ഹൈന്ദവ, ക്രൈസ്തവ, ഇസ്‌ലാംമത വിശ്വാസികളുടെ ആചാരങ്ങളെ തകര്‍ക്കാനുള്ള പിണറായി സര്‍ക്കാരിനെതിരേ ശക്തമായ പോരാട്ടത്തിന്റെ ഭാഗമായാണ് കറുപ്പ് വസ്ത്രമണിഞ്ഞ് സഭയില്‍ വന്നത്. ഇത് ഒരു മതത്തിന്റെ മാത്രം കാര്യമല്ല. ആചാരങ്ങളെയും വിശ്വാസങ്ങളെയും തകര്‍ക്കാന്‍ ആര് ഇറങ്ങിയാലും ശക്തമായി പോരാടുമെന്നും പി.സി ജോര്‍ജ് പറഞ്ഞു.
സുപ്രിംകോടതി ഉത്തരവുമായെത്തിയ കെ.എം ഷാജിയെ പ്രതിപക്ഷ അംഗങ്ങള്‍ കൈയടിയോടെയാണ് സ്വീകരിച്ചത്. തന്നെ സഭയില്‍നിന്ന് മാറ്റിനിര്‍ത്തുന്നതില്‍ സ്പീക്കര്‍ രാഷ്ട്രീയം കളിച്ചെന്ന് ഷാജി പറഞ്ഞു. സഭാംഗത്വം റദ്ദാക്കിയ നിയമസഭാ സെക്രട്ടറിയുടെ നടപടി മുന്‍വിധിയോടെയാണ്. നിയമനടപടികള്‍ തുടരുമെന്നും ഷാജി പറഞ്ഞു.