ഭുവനേശ്വര്‍: ഹോക്കി ലോകകപ്പില്‍ ഫ്രാന്‍സിന് സമനില. കരുത്തരായ സ്‌പെയിനിനെയാണ് ഫ്രാന്‍സ് സമനിലയില്‍ തളച്ചത്. ആറാം മിനുട്ടില്‍ ഫ്രഞ്ച് താരം ക്ലമന്റാണ് ആദ്യം ഗോള്‍ നേടിയത്. എന്നാല്‍ മത്സരം അവസാനിക്കാന്‍ മിനുട്ടുകള്‍ മാത്രം ശേഷിക്കെ സ്‌പെയിനിന് വേണ്ടി ഇഗ്ലസിയസ് സമനില ഗോള്‍ നേടുകയായിരുന്നു.
മറ്റൊരു മത്സരത്തില്‍ ഒളിംപിക്‌സ് ചാംപ്യന്‍മാരായ അര്‍ജന്റീന 3-0 എന്ന സ്‌കോറിന് ന്യൂസിലന്‍ഡിനെ പരാജയപ്പെടുത്തി. കളിയിലുടനീളം മികച്ച പ്രകടനം പുറത്തെടുത്ത അര്‍ജന്റീനയുടേത് ആധികാരിക ജയമായിരുന്നു. മസല്ലി (23), വില (41), മാര്‍ട്ടിന്‍സ് (55) എന്നിവരാണ് അര്‍ജന്റീനക്ക് വേണ്ടി ഗോളുകള്‍ നേടിയത്. ആദ്യ മത്സരത്തില്‍ ന്യൂസിലന്‍ഡ് ഫ്രാന്‍സിനെയും അര്‍ജന്റീന സ്‌പെയിനിനെയും പരാജയപ്പെടുത്തിയിരുന്നു. ഗ്രൂപ്പ് ഘട്ടത്തിലെ അടുത്ത മത്സരത്തില്‍ ആറിന് സ്‌പെയിന്‍ ന്യൂസിലന്‍ഡിനെയും അര്‍ജന്റീന ഫ്രാന്‍സിനേയും നേരിടും. ഇന്ന് നടക്കുന്ന മത്സരത്തില്‍ ഇംഗ്ലണ്ട് ആസ്‌ത്രേലിയയുമായും അയര്‍ലന്‍ഡ് ചൈനയുമായും ഏറ്റുമുട്ടും.