ഇരിട്ടി: കനത്ത മഴയില്‍ തകര്‍ന്ന തലശ്ശേരി-കുടക് റോഡ് ഇന്നലെ മുതല്‍ ചെറുവാഹനങ്ങള്‍ക്കായി തുറന്ന് കൊടുത്തു. ജീപ്പ്, കാര്‍, ഓട്ടോറിക്ഷ തുടങ്ങിയ വാഹനങ്ങള്‍ക്കാണ് യാത്രക്ക് അനുമതി നല്‍കിയിരിക്കുന്നത്. 

മടിക്കേരി പൊതുമരാമത്തു വകുപ്പ് സംഘം റോഡ് പ്രവൃത്തി പരിശോധിച്ച് ഉറപ്പുവരുത്തിയശേഷം നാളെ മുതല്‍ ബസ് ഉള്‍പ്പെടെയുള്ള വലിയ വാഹനങ്ങളെ ഇതുവഴി കടത്തിവിടാന്‍ കഴിയുമെന്ന് അസി. എക്‌സിക്യൂട്ടിവ് എന്‍ജിനിയര്‍ എന്‍.ഇ സുരേഷ് പറഞ്ഞു. കഴിഞ്ഞ 20ന് പുലര്‍ച്ചെ ആറു മണിയോടെ ആയിരുന്നു കൂട്ടുപുഴ മാക്കൂട്ടം-പെരുമ്പാടി ചുരംറോഡില്‍ പെരുമ്പാടി ചെക്ക് പോസ്റ്റിന് സമീപമുള്ള തടാകത്തിന്റെ അരികു ചേര്‍ന്ന റോഡ് മുപ്പതു മീറ്ററോളം ഒഴുകിപ്പോയത്. ബ്രഹ്മഗിരി മലനിരകളോട് ചേര്‍ന്ന് നില്‍ക്കുന്ന ഈ പ്രദേശത്തെ ഉള്‍വനങ്ങളില്‍ ഉണ്ടായ മഴയിലും ഉരുള്‍ പൊട്ടലിലും തടാകത്തില്‍ ക്രമാതീതമായി വെള്ളം കയറിയത് മൂലമുണ്ടായ മര്‍ദ്ദമാവാം റോഡ് തകരാനും ഒലിച്ചു പോവാനും ഇടയാക്കിയത് എന്നാണു കരുതുന്നത്. റോഡ് തകര്‍ന്നതുമൂലം കുടക് ഭരണകൂടം റോഡ് അടച്ചിട്ടു. ഇതോടെ കണ്ണൂര്‍ ജില്ലയും കുടകുമായുള്ള ബന്ധം നിലച്ചു. തുടര്‍ന്നാണ് കുടക് ജില്ലാ ഭരണകൂടവും കര്‍ണാടക പൊതുമരാമത്തു വകുപ്പും ചേര്‍ന്ന് റോഡിന്റെ പുനര്‍നിര്‍മാണ പ്രവൃത്തികള്‍ തുടങ്ങിയത്. പത്തുദിവസം കഴിയുമ്പോഴേക്കും റോഡ് പുനര്‍ നിര്‍മിക്കാനും ഗതാഗതം പുനഃസ്ഥാപിക്കാനും കഴിഞ്ഞത് ഈ റോഡിന്റെ പ്രാധാന്യം മനസ്സിലാക്കി കുടക് ഭരണകൂടം ഉണര്‍ന്നു പ്രവര്‍ത്തിച്ചതും മാക്കൂട്ടം ചുരം റോഡ് സംരക്ഷണ കര്‍മ്മ സമിതിയുടെ പ്രവര്‍ത്തനം കാരണവുമാണെന്ന് കര്‍മസമിതി പ്രസിഡന്റ് സി.കെ പ്രത്യുനാഥ് പറഞ്ഞു.