നാദാപുരം: മാലിന്യ നീക്കം പൂര്‍ത്തിയായില്ല. യുവജന സംഘടനകളും സന്നദ്ധസംഘടനകളും പരസ്പരം കൈകോര്‍ത്തതിനെ നാദാപുരം കല്ലാച്ചി അങ്ങാടികളില്‍ കെട്ടിക്കിടങ്ങുന്ന മാലിന്യത്തിന്റെ വലിയ പങ്കു നീക്കം ചെയ്‌തെങ്കിലും അവശേഷിക്കുന്നവ റോഡരികില്‍ കെട്ടിക്കിടക്കുന്നതിനാല്‍ ആരോഗ്യ ഭീഷണി ഉയര്‍ത്തുകയാണ്.
ടൗണിലെ മാലിന്യ നീക്കം നിലച്ചതിനാല്‍ സന്നദ്ധ സംഘടനാ പ്രവര്‍ത്തകര്‍ രംഗത്തിറങ്ങുകയും ഇവ ശേഖരിച്ചു കയറ്റി അയക്കുകയുമായിരുന്നു. നിറവിന്റെ സഹായത്തോടെ മൂന്നു ഘട്ടങ്ങളിലായി നാല് ലോഡ് മാലിന്യങ്ങളാണ് ഇവിടെനിന്ന് കയറ്റിഅയച്ചത്.
എന്നാല്‍ ബാക്കി വന്ന മാലിന്യങ്ങള്‍ റോഡില്‍ നിന്ന് നീക്കാന്‍ പഞ്ചായത്തിന്റെ ഭാഗത്തു നിന്ന് നീക്കം നടക്കാത്തതാണ് പരിസരത്തു പരന്നൊഴുകി ആരോഗ്യ പ്രശ്‌നം ഉയര്‍ത്തുന്നത്. സാംക്രമിക രോഗങ്ങള്‍ പെരുകി പകര്‍ച്ച വ്യാധികള്‍ വ്യാപക മാകുന്നതിനിടയിലും പൊതു സ്ഥലങ്ങളില്‍ ശുചീകരണം നടത്താത്ത അധികൃതരുടെ നിലപാട് പ്രതിഷേധത്തിനിടയാക്കുകയാണ്. കല്ലാച്ചി വിംസ് ഹോസ്പിറ്റലിന് സമീപത്തെ കവലയിലാണ് വളയം വാണിമേല്‍ ഭാഗങ്ങളിലേക്കുള്ള ടാക്‌സി സ്റ്റാന്‍ഡുകള്‍ പ്രവര്‍ത്തിക്കുന്നത്.
മാലിന്യക്കൂമ്പാരത്തില്‍ നിന്ന് പരന്നൊഴുകുന്ന മലിന ജലത്തില്‍ ചവിട്ടിയിട്ട് വേണം ഇവിടെ എത്താന്‍. വിദ്യാര്‍ഥികളും ടൗണില്‍ വിവിധ ആവശ്യങ്ങള്‍ക്കായി എത്തുന്നവരും ഈ മലിന ജലത്തിന്റെ പ്രയാസം നേരിട്ടനുഭവിക്കുകയാണ്.
മാര്‍ക്കറ്റ് റോഡിനു പിന്‍വശം, നാദാപുരം ഗവ.യു.പി.സ്‌കൂളിനു മുന്‍ വശത്തെ പോസ്റ്റ് ഓഫിസിനായി വിലക്ക് വാങ്ങിയ സ്ഥലം, ബസ് സ്റ്റാന്‍ഡിനു പിന്‍വശം എന്നിവിടങ്ങളിലെല്ലാം സമാന സ്ഥിതിയാണുള്ളത് .