കൊല്ലം: ക്യൂ സമ്പ്രദായം അപരിഷ്‌കൃതമാണെന്നു കണ്ടെത്തിയതിനെത്തുടര്‍ന്നു ബിവറേജസ് ഔട്ട്‌ലെറ്റുകള്‍ കെട്ടിലുംമട്ടിലും മാറുന്നു. ബിവറേജസ് കോര്‍പറേഷന്റെ ഔട്ട്‌ലെറ്റുകളില്‍ ഇനി മദ്യംവാങ്ങാന്‍ ക്യൂ നില്‍ക്കേണ്ട ആവശ്യമില്ല. ഇഷ്ടമുള്ള മദ്യം തെരഞ്ഞെടുക്കാനുള്ള സൗകര്യം ഒരുങ്ങുകയാണ്.

തിരക്കുള്ള ഔട്ട്‌ലെറ്റുകളെ, മദ്യം വാങ്ങാനെത്തുന്നവര്‍ക്ക് ഇഷ്ടമുള്ള മദ്യം സ്വയം തിരഞ്ഞെടുക്കാന്‍ കഴിയുന്നതരത്തില്‍ പ്രീമിയം കൗണ്ടറുകളാക്കാനാണ് പദ്ധതി. ഗ്രാമ-നഗര വ്യത്യാസമില്ലാതെ തിരക്കുള്ള ഔട്ട്‌ലെറ്റുകള്‍ പ്രീമിയം കൗണ്ടറാക്കി മാറ്റും. ഇതിനായി സ്ഥല സൗകര്യമുള്ള ഔട്ട്‌ലെറ്റുകളില്‍ ബിവറേജസ് കോര്‍പറേഷന്‍ പരിശോധന ആരംഭിച്ചു.

പരീക്ഷണാടിസ്ഥാനത്തില്‍ നടപ്പാക്കുന്ന പദ്ധതി വിജയിച്ചാല്‍ സംസ്ഥാനത്തൊട്ടാകെയുള്ള ഔട്ട്‌ലറ്റുകള്‍ പ്രീമിയം കൗണ്ടറുകളാക്കി മാറ്റും. ഔട്ട്‌ലെറ്റുകളിലെ വലിയ ക്യൂ പലപ്പോഴും ഗതാഗത തടസം ഉണ്ടാക്കാറുണ്ടെന്നും ഇതെല്ലാം ഒഴിവാക്കാനാണ് പുതിയ സംവിധാനം കൊണ്ടുവരുന്നതെന്നും നിലവിലെ ഷോപ്പുകള്‍ പരിഷ്‌കരിക്കുക മാത്രമാണ് ചെയ്യുന്നതെന്നും കോര്‍പറേഷന്‍ അധികൃതര്‍ പറയുന്നത്.