ന്യൂഡല്‍ഹി: ഇന്ന് നടക്കുന്ന ഉപരാഷ്ട്രപതി തെരഞ്ഞെടുപ്പിന് മുന്നോടിയായി ബി.ജെ.പി തങ്ങളുടെ എം.പിമാര്‍ക്കായി നടത്തിയ ഡമ്മി വോട്ടെടുപ്പില്‍ 16 വോട്ടുകള്‍ അസാധു.
എന്‍.ഡി.എയിലെ സഖ്യകക്ഷികള്‍ക്കായി നടത്തിയ വോട്ടെടുപ്പിലാണ് 16 പേരുടെ വോട്ട് അസാധുവായത്. വിവരമറിഞ്ഞ് അരിശം പൂണ്ട അമിത്ഷാ എം.പിമാര്‍ക്കു നേരെ ക്ഷുഭിതനായി.

കൃത്യമായ മാര്‍ഗനിര്‍ദേശങ്ങള്‍ക്കും പരിശീലനത്തിനും ശേഷമാണ് ഡമ്മി വോട്ടെടുപ്പ് നടത്തിയത്. രാഷ്ട്രപതി തെരഞ്ഞെടുപ്പില്‍ നേരത്തെ 21 വോട്ടുകള്‍ അസാധുവായിരുന്നു. ഇതില്‍ കൂടുതലും എന്‍.ഡി.എ എം.പിമാരുടേതെന്നാണ് വിലയിരുത്തല്‍. ഇതിനെത്തുടര്‍ന്നാണ് ഡമ്മി വോട്ടെടുപ്പ് നടത്താന്‍ ബി.ജെ.പിയെ പ്രേരിപ്പിച്ചത്. എങ്ങനെ വോട്ട് ചെയ്യണമെന്ന് ബി.ജെ.പി മുതിര്‍ന്ന നേതാവ് ഭൂപേന്ദര്‍ യാദവ് പരിശീലിപ്പിച്ചു കൊടുത്ത ശേഷമാണ് അസാധുവായി രേഖപ്പെടുത്തിയത്. ഇതിന് മിസൈല്‍ ശാസ്ത്രമൊന്നും പഠിക്കേണ്ടതില്ലെന്നും അദ്ദേഹം കുറ്റപ്പെടുത്തി.