അശ്‌റഫ് കൊണ്ടോട്ടി
കൊണ്ടോട്ടി: എം.എല്‍.എമാരുടെ ആസ്തിവികസന ഫണ്ട് ലൈഫ് മിഷന്‍ ഭവന സമുച്ചയങ്ങളുടെ നിര്‍മാണങ്ങള്‍ക്ക് വിനിയോഗിക്കാമെന്ന് ധനകാര്യ വകുപ്പിന്റെ നിര്‍ദേശം. സംസ്ഥാനത്തെ ലൈഫ് മിഷന്‍ മൂന്നാംഘട്ടത്തില്‍ ഉള്‍പ്പെട്ട ഭൂമി-ഭവന രഹിതര്‍ക്ക് സ്ഥലംവാങ്ങി ഭവന സമുച്ചയങ്ങള്‍ നിര്‍മിക്കുന്നതിലെ സാമ്പത്തിക പ്രയാസങ്ങള്‍ പരിഹരിക്കുന്നതിനാണ് നടപടി. നിലവില്‍ ഒരുവര്‍ഷത്തില്‍ അഞ്ചുകോടി രൂപയാണ് നിയോജക മണ്ഡല ആസ്തിവികസന ഫണ്ടായി എം.എല്‍.എമാര്‍ക്ക് നല്‍കുന്നത്. ഇവ മറ്റു പദ്ധതികള്‍ക്ക് വിനിയോഗിക്കാന്‍ ഇതുവരെ അനുമതിയുണ്ടായിരുന്നില്ല.
ഭവന സമുച്ചയങ്ങളുടെ നിര്‍മാണത്തിന് 50 ശതമാനത്തിന് മുകളില്‍ ആസ്തിവികസന ഫണ്ടാണ് വിനിയോഗിച്ചതെങ്കില്‍ കെട്ടിടത്തിന് പേര് നല്‍കുമ്പോള്‍ എം.എല്‍.എ ആസ്തിവികസന ഫണ്ട് എന്ന് ചേര്‍ക്കാമെന്നും നിര്‍ദേശിച്ചിട്ടുണ്ട്.
സംസ്ഥാനത്ത് 3,37,416 പേരാണ് ഭൂരഹിത-ഭവന രഹിതരായുള്ളത്. ഇവര്‍ക്ക് താമസിക്കാനാണ് ഭവന സമുച്ചയങ്ങള്‍ നിര്‍മിക്കുന്നത്. ഇതിനായി സ്ഥലം കണ്ടെത്താനുള്ള സാമ്പത്തിക ബാധ്യതയില്‍ കുടുങ്ങിയിരിക്കുകയാണ് തദ്ദേശസ്ഥാപനങ്ങള്‍. കെട്ടിടങ്ങള്‍ നിര്‍മിക്കാനുള്ള ഫണ്ട് സ്ഥലം വാങ്ങാന്‍ വിനിയോഗിക്കേണ്ട ഗതികേടാണിപ്പോഴുള്ളത്. അതിനാല്‍ മിക്ക തദ്ദേശ സ്ഥാപനങ്ങളിലും മൂന്നാംഘട്ട ലൈഫ് മിഷന്‍ പദ്ധതി ഇഴഞ്ഞുനീങ്ങുകയാണ്.സംസ്ഥാനത്ത് ഗ്രാമപഞ്ചായത്തുകളില്‍ 2,30,364 പേരാണ് ഭൂമിയും വീടുമില്ലാത്തവരായുള്ളത്. നഗരസഭകളില്‍ 49,044 പേരും കോര്‍പറേഷനുകളില്‍ 58,008 പേരുമാണുള്ളത്