നെയ്യാറ്റിന്‍കര: കേരള സര്‍ക്കാരിന്റെ നിര്‍ദ്ദേശ പ്രകാരം താലൂക്ക് തലത്തില്‍ നടത്തിവരാറുളള ജില്ലാ കലക്ടറുടെ പൊതുജന പരാതി പരിഹാര അദാലത്ത് നെയ്യാറ്റിന്‍കര താലൂക്കില്‍ ഇന്നലെ രാവിലെ 10 മണി മുതല്‍ വൈകിട്ട് 4 മണിവരെ നടന്നു.
താലൂക്ക് ഓഫീസിലെ കോണ്‍ഫറന്‍സ് ഹാളില്‍ കെ.ആന്‍സലന്‍ എം.എല്‍.എ ഉദ്ഘാടനം ചെയ്തു. നഗരസഭ ചെയര്‍ പേഴ്‌സണ്‍ ഡബ്ല്യു.ആര്‍.ഹീബ , വൈസ് ചെയര്‍മാന്‍ ഷിബു , മറ്റ് ജനപ്രതിനിധികള്‍ തുടങ്ങിയവര്‍ പങ്കെടുത്തു. തിരുവനന്തപുരം അഡീഷണല്‍ ജില്ലാ മജിസ്‌ട്രേറ്റ് വി.ആര്‍.വിനോദിന്റെ നേതൃത്വത്തില്‍ പരാതികള്‍ പരിശോധിക്കുകയും ബന്ധപ്പെട്ട വകുപ്പ് ഉദ്യോഗസ്ഥരില്‍ നിന്നും വിശദീകരണം വാങ്ങി പരാതിയ്ക്ക് പരിഹാരം കാണുകയും മറ്റുളളവയില്‍ അടിയന്തിര നടപടി നിര്‍ദ്ദേശിക്കുകയും ചെയ്തു.
അദാലത്തില്‍ വിവിധ വകുപ്പുകളിലായി ആകെ 202 പരാതികള്‍ ലഭിച്ചിട്ടുളളതും ഈ പരാതികളില്‍ 107 എണ്ണം തീര്‍പ്പാക്കുകയും തീരുമാനം കൈക്കൊളളാന്‍ സാധിക്കാത്ത 85 കേസുകളില്‍ ഒരാഴ്ചയ്ക്കകം നടപടി സ്വീകരിക്കാന്‍ ബന്ധപ്പെട്ട വകുപ്പുകള്‍ക്ക് നിര്‍ദ്ദേശം നല്‍കുകയും ചെയ്തു. ആദാലത്തില്‍ പങ്കെടുത്ത എല്ലാ ജീവനക്കാര്‍ക്കും പൊതുജനങ്ങള്‍ക്കും നെയ്യാറ്റിന്‍കര തഹസീല്‍ദാര്‍ കെ.മോഹനകുമാര്‍ നന്ദി രേഖപ്പെടുത്തി.എന്നാല്‍ പൊതുജന പരാതി പരിഹാര അദാലത്തില്‍ കലക്ടര്‍ പങ്കെടുക്കാതിരുന്നത് പൊതുജനങ്ങള്‍ക്കിടയില്‍ ശക്തമായ പ്രതിഷേധത്തിനിടയാക്കി.
കലക്ടര്‍ എത്തുമെന്ന പ്രതീക്ഷയില്‍ രണ്ടു മണിവരെ പൊതുജനങ്ങള്‍ കാത്തു നില്‍ക്കുകയായിരുന്നു. തുടര്‍ന്ന് നിരാശരരായി മടങ്ങികയാണുണ്ടായത്. അദാലത്ത് വെറും പ്രഹസനമായിരുന്നുയെന്നും പൊതുജനങ്ങള്‍ക്കിടയില്‍ ആക്ഷേപമുയര്‍ന്നിരുന്നു. മുന്‍ വര്‍ഷങ്ങളെ അപേക്ഷിച്ച് അദാലത്തില്‍ ജനത്തിരക്ക് നന്നെ കുറവായിരുന്നു. വേണ്ട വിധം അറിയിപ്പ് നല്‍കിയിരുന്നില്ലാ എന്നും പരാതിയുണ്ട്.