കോഴിക്കോട് ജില്ലയിലെ മാവൂരില്‍ ഒരു കിണറിലെ വെള്ളം പരിശോധിച്ചപ്പോള്‍ കിട്ടിയ ഫലം ഞെട്ടിക്കുന്നതാണ്. കോളറ പടര്‍ത്തുന്ന രോഗാണുക്കള്‍ കിണര്‍വെള്ളത്തില്‍ കണ്ടതായാണു വാര്‍ത്ത. മലപ്പുറം ജില്ലയില്‍ ഒരിടത്തു കോളറ ബാധയുണ്ടായതായും വാര്‍ത്തയുണ്ടായിരുന്നു. ഒരുകാലത്തു കേരളത്തില്‍ അനേകായിരം മനുഷ്യജീവന്‍ കവര്‍ന്നെടുത്ത കോളറയുടെ തിരിച്ചുവരവാണ് അതു സൂചിപ്പിക്കുന്നത്.
ആരോഗ്യരംഗത്തു കേരളം ലോകത്തിനുതന്നെ മാതൃകയാണെന്നാണു നമ്മള്‍ അവകാശപ്പെട്ടിരുന്നത്. വസൂരിയും കോളറയുമെല്ലാം ഈ നാട്ടില്‍നിന്നു കെട്ടുകെട്ടിച്ചുവെന്നും അഭിമാനിച്ചിരുന്നു.
എന്നാല്‍, അവയില്‍ ഓരോ മാരകരോഗവും തിരിച്ചുവരികയാണെന്നു ഭയക്കേണ്ടിയിരിക്കുന്നു. സമീപഭാവിയില്‍ കേരളത്തില്‍ വീണ്ടും ദുരന്തം വിതയ്ക്കാന്‍ ഈ രോഗങ്ങള്‍ക്കു കഴിയുമെന്നും പേടിക്കേണ്ടിയിരിക്കുന്നു.ഇതിനു കാരണക്കാര്‍ വൃത്തിയും വെടിപ്പും കൈവെടിഞ്ഞ നമ്മള്‍ തന്നെയാണെന്നു സമ്മതിക്കാതെ തരമില്ല.
പേരിനു ശുചിത്വപരിപാടികള്‍ ആഘോഷപൂര്‍വം നടത്താറുണ്ടെങ്കിലും കേരളത്തിന്റെ തെക്കേയറ്റം മുതല്‍ വടക്കേയറ്റംവരെയും മാലിന്യക്കൂമ്പാരങ്ങളുടെ കാഴ്ചകളേ കാണാനുള്ളു. കേരളത്തിലെ 70 ശതമാനത്തോളം കിണറുകളും മറ്റു ജലാശയങ്ങളും മാലിന്യത്തിന്റെ പിടിയിലാണെന്നാണു പഠനങ്ങള്‍ തെളിയിക്കുന്നത്.
ഇത്രയൊക്കെയായിട്ടും ഭരണക്കസേരയിലിരിക്കുന്നവരോ പൊതുജനമോ ഇതിലൊന്നും ആശങ്കപ്പെടുന്നില്ലെന്നതാണ് അത്ഭുതം. വിലകുറഞ്ഞ രാഷ്ട്രീയവാഗ്വാദങ്ങളിലാണല്ലോ കേരളീയര്‍ക്കു താല്‍പര്യം.