പട്‌ന: ഭാരത് മാത കീ ജയ് വിളിക്കാത്തവര്‍ പാകിസ്താനെ പിന്തുണക്കുന്നവരാണെന്ന് ബിഹാര്‍ മന്ത്രി. ബി.ജെ.പി മന്ത്രി വിനോദ് കുമാറാണ് പരിപാടിക്കിടെ മാധ്യമപ്രവര്‍ത്തകരോട് ഇത്തരത്തില്‍ പ്രതികരിച്ചത്.

പരിപാടിയില്‍ സംസാരിക്കുന്നതിനിടെ വിനോദ് കുമാര്‍ ഭാരത മാതാ കീ ജയ് എന്ന മുദ്രാവാക്യം കൈകളുയര്‍ത്തി മുഴക്കാന്‍ സദസ്സിനോട് ആവശ്യപ്പെട്ടു. കൂട്ടത്തില്‍ കൈകളുയര്‍ത്താതെയിരുന്നവരോടായിരുന്നു മന്ത്രിയുടെ ചോദ്യം.

'ചിലയാളുകള്‍ കൈകള്‍ ഉയര്‍ത്താതെയിരിക്കുന്നത് ഞാന്‍ കാണുന്നുണ്ട്. അവര്‍ പാകിസ്താന്റെ ആളുകളാണോ. ആദ്യം നമ്മള്‍ ഭാരതാംബയുടെ മക്കളാണ്. പിന്നീടാണ് പത്രത്തിന്റെയും ചാനലുകളുടെയും സഹോദരങ്ങളാവുന്നത്.

അതിനിടെ, പരാമര്‍ശം വിവാദമായതോടെ മന്ത്രി മാപ്പു പറഞ്ഞു. തന്റെ വാക്കുകള്‍ വളച്ചൊടിക്കുകയായിരുന്നുവെന്നാണ് മന്ത്രിയുടെ വിശദീകരണം. താന്‍ സംസാരിക്കുന്നതിന്റെ ദൃശ്യങ്ങള്‍ കണ്ടാല്‍ അത് ബോധ്യമാവുമെന്നും അദ്ദേഹം വ്യക്തമാക്കി. താന്‍ ഇതുവരെ വിദ്വേഷപരമായ രീതിയില്‍ പ്രസ്താവനകള്‍ ഇറക്കിയിട്ടില്ല. ഇത് വളച്ചൊടിച്ചതാണെന്നും അദ്ദേഹം കൂട്ടിച്ചേര്‍ത്തു.

നിതീഷ്- ബി.ജെ.പി സഖ്യ മന്ത്രി സഭയിലെ അംഗമാണ് വിനോദ് കുമാര്‍.