തിരുവനന്തപുരം: അതിരപ്പിളളി പദ്ധതിയുമായി മുന്നോട്ട് തന്നെയെന്ന് വ്യക്തമാക്കി സര്‍ക്കാര്‍. പദ്ധതിക്കായി പ്രാരംഭ നടപടികള്‍ തുടങ്ങിയതായി വൈദ്യുതി മന്ത്രി എം.എം മണി നിയമസഭയെ അറിയിച്ചു.

വനേതര പ്രവര്‍ത്തനങ്ങള്‍ക്ക് വനഭൂമി ഉപയോഗിക്കാനുളള നടപടി പൂര്‍ത്തികരിച്ചെന്നും പ്രതിപക്ഷ എം.എല്‍.എ വി.കെ ഇബ്രാഹിംകുഞ്ഞിന്റെ ചോദ്യത്തിനു മറുപടിയായി മന്ത്രി പറഞ്ഞു.

നേരത്തെ അതിരപ്പള്ളി പദ്ധതിയുമായി മുന്നോട്ടാണെന്ന് പ്രസ്താവന വിവാദങ്ങള്‍ ഉയര്‍ത്തിയിരുന്നു. പദ്ധതിക്കെതിരെ സി.പി.ഐയുടെ എതിര്‍പ്പും ശക്തമാണ്. ഇതോടെ പദ്ധതിയില്‍ നിന്നും സര്‍ക്കാര്‍ പിന്‍വാങ്ങിയിരുന്നു.

അതേസമയം, അതിരപ്പിളളി പദ്ധതി ഉപേക്ഷിച്ച പദ്ധതിയാണെന്ന് ചാലക്കുടി പുഴ സംരക്ഷണ സമിതി പറഞ്ഞു. മന്ത്രി മണി സഭയില്‍ പറഞ്ഞത് മുഖവിലയ്‌ക്കെടുക്കുന്നില്ലെന്നും ഇത് സര്‍ക്കാര്‍ നിലപാടായി കാണുന്നില്ലെന്നും പുഴ സംരക്ഷണ സമിതി അറിയിച്ചു.