റിയാദ്: സഊദി എയര്‍ലൈന്‍സിന്റെ ഖാര്‍തൂം ജിദ്ദ വിമാനത്തില്‍ പുക ഉയര്‍ന്നതിനെ തുടര്‍ന്ന് അടിയന്തര ലാന്‍ഡിങ് നടത്തി. സഊദി എയര്‍ലൈന്‍സിന്റെ 3453 വിമാനമാണ് പറന്നുയര്‍ന്നു നിമിഷങ്ങള്‍ക്കകം തിരിച്ചിറക്കിയതെന്നു ജിദ്ദ കിങ് അബ്ദുല്‍ അസീസ് അന്താരാഷ്ട്ര വിമാനത്താവള അധികൃതര്‍ അറിയിച്ചു.

വിമാനത്തിനകത്തെ ഭക്ഷണസാധനങ്ങള്‍ ചൂടാക്കുന്ന ഉപകരണത്തില്‍ നിന്നാണ് പുക ഉയര്‍ന്നത്. പുക ശ്വസിച്ച രണ്ടു യാത്രക്കാര്‍ക്ക് ചികിത്സ നല്‍കിയതായും എയര്‍പോര്‍ട്ട് അധികൃതര്‍ വ്യക്തമാക്കി. 251 യാത്രക്കാരുമായി ഖാര്‍ത്തൂമിലേക്ക് തിരിച്ച വിമാനം തിരിച്ചിറക്കുമ്പോള്‍ അടിയന്തര സാഹചര്യം നേരിടാന്‍ എല്ലാ സജ്ജീകരണങ്ങളും തയ്യാറാക്കിയിരുന്നു.