രാത്രി വൈകിയും പ്രതിഷേധം തുടരുന്നു
കോതമംഗലം: സഭാ തര്‍ക്കത്തെത്തുടര്‍ന്ന് കോതമംഗലം പള്ളിയില്‍ സംഘര്‍ഷഭരിതമായ അന്തരീക്ഷം തുടരുന്നു. അനുകൂല കോടതിവിധിയുമായി വീണ്ടും പള്ളിയില്‍ പ്രവേശിക്കാനെത്തിയ ഓര്‍ത്തഡോക്‌സ് റമ്പാനെ യാക്കോബായ വിശ്വാസികള്‍ തടഞ്ഞു. ഓര്‍ത്തഡോക്‌സ് വിഭാഗത്തിന് അനുകൂലമായ കോടതി വിധി നടപ്പിലാക്കണമെന്ന് ആവശ്യപ്പെട്ട് ഇന്നലെ മാര്‍തോമാ ചെറിയ പള്ളിയില്‍ എത്തിയ റമ്പാന്‍ തോമസ് പോളിനെയാണ് സ്ത്രീകള്‍ ഉള്‍പ്പെടെയുള്ള യാക്കോബായ വിഭാഗം തടഞ്ഞത്.
കാറില്‍ നിന്നിറങ്ങാന്‍ സമ്മതിക്കാതെ യാക്കോബായ വിഭാഗം വളഞ്ഞതോടെ തിരിച്ചു പോകില്ലെന്ന നിലപാടില്‍ റമ്പാന്‍ കാറില്‍ തന്നെ ഇരിപ്പുറപ്പിച്ചു. ഓര്‍ത്തഡോക്‌സ് വിഭാഗത്തിന് അനുകൂലമായ കോടതി വിധി നടപ്പാക്കാത്തതിനെ തുടര്‍ന്ന് പൊലിസിനെതിരേ തോമസ് പോള്‍ റമ്പാന്‍ കോടതിയെ സമീപിച്ചിരുന്നു. വിഷയത്തില്‍ കോടതിയുടെ രൂക്ഷ വിമര്‍ശനമാണ് പൊലിസ് ഏറ്റുവാങ്ങിയത്.ഈ സാഹചര്യത്തിലായിരുന്നു പൊലിസ് സംരക്ഷണത്തോടെ പ്രാര്‍ഥന നിര്‍വഹിക്കാന്‍ ചെറിയപള്ളിയില്‍ തോമസ് പോള്‍ റമ്പാന്‍ എത്തിയത്.
റമ്പാന്‍ എത്തുമെന്നറിഞ്ഞതോടെ അതിരാവിലെതന്നെ യാക്കോബായ വിഭാഗം വിശ്വാസികള്‍ പള്ളിയില്‍ തടിച്ചുകൂടിയിരുന്നു. എന്നാല്‍ 10.30 ഓടെ ആയിരുന്നു റമ്പാന്‍ എത്തിയത്. റമ്പാനെ തടഞ്ഞതോടെ പൊലിസ് 30 ഓളം പേരെ അറസ്റ്റ് ചെയ്ത് നീക്കി. ഇതോടെ പൊലിസുമായി വിശ്വാസികള്‍ ഉന്തും തള്ളുമായി. ഇതിനിടയില്‍ എട്ടു പേര്‍ക്ക് പരുക്കേറ്റു. ഇവരെ ബസേലിയോസ് ആസ്പത്രിയില്‍ പ്രവേശിപ്പിച്ചു.
സംഭവസ്ഥലത്ത് ഉന്നത പൊലിസ് ഉദ്യോഗസ്ഥരുമായി നടത്തിയ ചര്‍ച്ചയെ തുടര്‍ന്ന് ഉടന്‍ തിരിച്ചു വരുമെന്നും പ്രാര്‍ഥനക്കുള്ള സാഹചര്യമൊരുക്കണമെന്നും ആവശ്യമുന്നയിച്ച് റമ്പാന്‍ മടങ്ങി.
ഒരു മണിയോടെ വീണ്ടും തിരിച്ചെത്തി പള്ളി അങ്കണത്തിലേക്ക് പ്രവേശിക്കാന്‍ എത്തിയതോടെ യാക്കോബായ വിശ്വാസികള്‍ പൊലിസ് വലയം ഭേദിച്ച് റമ്പാന്റെ വാഹനം വളയുകയായിരുന്നു തുടര്‍ന്ന് പൊലിസ് വലയം തീര്‍ത്ത് റമ്പാന്റെ വാഹനത്തിന് കവചമൊരുക്കിയിരിക്കുകയാണ്. രാത്രി ഏറെവൈകിയും ഇതേ നില തുടരുകയാണ്. രാത്രി വൈകിയും സമീപ പ്രദേശങ്ങളിലെ നിരവധി യാക്കോബായ വിശ്വാസികള്‍ പള്ളിമുറ്റത്തെ പ്രതിഷേധത്തില്‍ പങ്കുചേരാന്‍ എത്തിക്കൊണ്ടിരിക്കുകയാണ്.