കല്‍പ്പറ്റ, കുപ്പാടി സ്മാര്‍ട്ട് വില്ലേജുകളുടെ ഉദ്ഘാടനവും നിര്‍വഹിക്കും കല്‍പ്പറ്റ: ജില്ലാതല പട്ടയമേളയും കല്‍പ്പറ്റ, കുപ്പാടി സ്മാര്‍ട്ട് വില്ലേജ് ഓഫിസുകളുടെ ഉദ്ഘാടനവും 29ന് റവന്യൂ മന്ത്രി ഇ. ചന്ദ്രശേഖരന്‍ നിര്‍വഹിക്കും. പട്ടയമേളയും കല്‍പ്പറ്റ സ്മാര്‍ട്ട് വില്ലേജ് ഓഫിസിന്റെ ഉദ്ഘാടനവും കല്‍പ്പറ്റ ടൗണ്‍ഹാളിലാണ് നടക്കുക. മേളയില്‍ 488 പട്ടയംകൈവശരേഖകള്‍ വിതരണം ചെയ്യും. ഇതില്‍ 385 പട്ടയവും 103 കൈവശരേഖയും ഉള്‍പ്പെടും. മൂന്ന് താലൂക്കുകളിലായി 126 എല്‍.എ പട്ടയവും, 13 മിച്ചഭൂമി പട്ടയവും, 246 ലാന്റ് ട്രൈബൂണല്‍ പട്ടയവുമാണ് വിതരണത്തിന് തയാറായത്. മുത്തങ്ങ സമരക്കാര്‍ക്കാണ് കൈവശരേഖ നല്‍കുന്നത്. സുല്‍ത്താന്‍ ബത്തേരി താലൂക്കിന്‍ കീഴിലെ കുപ്പാടി സ്മാര്‍ട്ട് വില്ലേജ് ഓഫിസിന്റെ ഉദ്ഘാടനം ഓഫിസ് പരിസരത്ത് നടക്കും. ജില്ലാ നിര്‍മിതി കേന്ദ്രയാണ് സ്മാര്‍ട്ട് വില്ലേജ് ഓഫിസുകള്‍ നിര്‍മിച്ചത്. പട്ടയമേളയുടെയും കല്‍പ്പറ്റ, കുപ്പാടി സ്മാര്‍ട്ട് വില്ലേജ് ഓഫിസുകളുടെ ഉദ്ഘാടന കര്‍മങ്ങള്‍ക്കുമുള്ള ജില്ലാതല സംഘാടക സമിതി രൂപീകരണം കലക്ടറേറ്റില്‍ നടന്നു.  യോഗത്തില്‍ സി.കെ ശശീന്ദ്രന്‍ എം.എല്‍.എ, സുല്‍ത്താന്‍ ബത്തേരി ബ്ലോക്ക് പഞ്ചായത്ത് പ്രസിഡന്റ് ലതാശശി, കല്‍പ്പറ്റ ബ്ലോക്ക് പഞ്ചായത്ത് പ്രസിഡന്റ് ഉഷാതമ്പി, എ.ഡി.എം കെ. അജീഷ്, ഡെപ്യൂട്ടി കലക്ടര്‍ ഇ.പി മേഴ്‌സി, റവന്യൂ ഉദ്യോഗസ്ഥര്‍, ജനപ്രതിനിധികള്‍ തുടങ്ങിയവര്‍ പങ്കെടുത്തു.