ഗൂഡല്ലൂര്‍: കോയമ്പത്തൂര്‍ പെരിയതടാകം മേഖലയില്‍ നാശം വരുത്തിയിരുന്ന കാട്ടാനയെ മുതുമല വന്യജീവി സങ്കേതത്തിലെ ഉള്‍വനത്തില്‍ കൊണ്ടുവന്ന് വിട്ടു. പെരിയതടാകം, കുറുമ്പര്‍പാളയം, മങ്കര തുടങ്ങിയ മേഖലകളില്‍ ജനവാസ കേന്ദ്രങ്ങളിലും കൃഷിസ്ഥലങ്ങളിലും ഇറങ്ങി നാശം വരുത്തിയിരുന്ന വിനായകന്‍ എന്നു നാട്ടുകാര്‍ വിളിക്കുന്ന കാട്ടാനയെയാണ് വനംവകുപ്പ് പിടിച്ച് കൊണ്ടുവിട്ടത്. ആറ് മാസമായി വിനായകനും ചിന്നതമ്പി എന്ന പേരില്‍ അറിയപ്പെടുന്ന മറ്റൊരു കാട്ടാനയും ഈ മേഖലയില്‍ നാശം വരുത്തി വരികയായിരുന്നു. രണ്ട് ആനകളെയും പിടികൂടാനാണ് പദ്ധതിയിട്ടിരുന്നത്. എന്നാല്‍ ചിന്നതമ്പിയെ പിടികൂടാന്‍ സാധിച്ചിട്ടില്ല. ഈ ആനയെ പിടികൂടാനുള്ള നീക്കം തുടങ്ങിയിട്ടുണ്ട്. കാട്ടാനകളെ പിടികൂടി മുതുമലയിലേക്ക് കൊണ്ടുപോകണമെന്ന് നാട്ടുകാര്‍ ജില്ലാ കലക്ടര്‍ ഹരിഹരനോട് ആവശ്യപ്പെടുകയായിരുന്നു. തുടര്‍ന്ന് ഉന്നത വനംവകുപ്പ് ഉദ്യോഗസ്ഥനായ രഘുനാഥന്റെ ഉത്തരവ് പ്രകാരമാണ് ആനയെ ഡോക്ടര്‍ മനോഹരന്റെ നേതൃത്വത്തിലുള്ള മെഡിക്കല്‍ സംഘം മയക്കുവെടിവച്ച് പിടികൂടി മുതുമലയിലെ ഉള്‍വനത്തില്‍ കൊണ്ടുവന്ന് വിട്ടത്. മുതുമലയിലെ താപ്പാനകളായ വസീം, ബൊമ്മന്‍, ചേരന്‍, വിജയ് എന്നി ആനകളുടെ സഹായത്തോടെയാണ് കാട്ടാനയെ തളച്ചത്.  വളരെ പണിപ്പെട്ടാണ് ആനയെ ലോറിയില്‍ കയറ്റിയത്. താപ്പാനകളുടെ സഹായത്തോടെ ആനയെ ലോറിയില്‍ കയറ്റാന്‍ ശ്രമം നടത്തിയെങ്കിലും പരാജയപ്പെടുകയായിരുന്നു.  പിന്നീട് ജെസിബി കൊണ്ടുവന്നാണ് ആനയെ ലോറിയിലേക്ക് തള്ളികയറ്റിയത്. ഉന്നത വനംവകുപ്പ് ഉദ്യോഗസ്ഥരായ ദീപക് ശ്രീവാസ്തവ, വെങ്കിടേഷ്, സുരേഷ്, ഡോക്ടര്‍മാരായ മനോഹരന്‍, അശോകന്‍, വിജയരാഘവന്‍, കലൈവാണന്‍ എന്നിവരുടെ നേതൃത്വത്തിലുള്ള സംഘമാണ് ആനയെ മുതുമലയിലെത്തിച്ചത്.