തിരുവനന്തപുരം: പാലോട് പൊലിസ് സ്‌റ്റേഷന്‍ പരിധിയില്‍ ആദിവാസികള്‍ ആത്മഹത്യ ചെയ്ത സംഭവം ഗൗരവകരമായി കാണുന്നുവെന്നും ഇക്കാര്യം അന്വേഷിക്കുമെന്നും മുഖ്യമന്ത്രി പിണറായി വിജയന്‍ നിയമസഭയില്‍ അറിയിച്ചു. എ.പി അനില്‍കുമാറാണ് ചോദ്യോത്തരവേളയില്‍ വിഷയം അവതരിപ്പിച്ചത്. 2012നു ശേഷം 45 ആദിവാസികള്‍ ആത്മഹത്യ ചെയ്തതായി മന്ത്രി എ.കെ ബാലന്‍ വ്യക്തമാക്കി. തിരുവനന്തപുരം ജില്ലയിലെ ആദിവാസി മേഖലകളില്‍ ആത്മഹത്യകള്‍ പെരുകുന്നതായി റിപ്പോര്‍ട്ട് പുറത്തുവന്നിരുന്നു.
പാലോട് സ്റ്റേഷന്‍ പരിധിയിലെ ആദിവാസി ഊരുകളില്‍ ആത്മഹത്യ ചെയ്തവരിലേറെയും 15 നും മുപ്പത്തഞ്ചിനുമിടയില്‍ പ്രായമുള്ളവരാണ്. മദ്യപാനാസക്തി കാരണമായുണ്ടാകുന്ന വിഷാദവും ആത്മഹത്യാനിരക്ക് ഉയര്‍ത്തുന്നതായാണ് നിഗമനം. കഴിഞ്ഞയാഴ്ച വീണ എന്ന പെണ്‍കുട്ടി ആത്മഹത്യ ചെയ്ത സംഭവത്തില്‍ അന്വേഷണം നടത്തിയപ്പോഴാണ് തുടര്‍ മരണങ്ങളുടെ ഞെട്ടിപ്പിക്കുന്ന വിവരം ശ്രദ്ധയില്‍പ്പെട്ടത്. ഇക്കാര്യം ഗൗരവമായി കാണണമന്നും എ.പി അനില്‍കുമാര്‍ നിയമസഭയില്‍ ആവശ്യപ്പെട്ടു. വിശദമായി അന്വേഷിക്കുന്നതിന് പട്ടകജാതി പട്ടികവര്‍ഗ വകുപ്പ് ആഭ്യന്തരവകുപ്പിന് കത്തു നല്‍കാമെന്നും ആദ്യം പൊലിസ് അന്വേഷിക്കട്ടേയെന്നും മന്ത്രി എ.കെ ബാലന്‍ മറുപടി പറഞ്ഞെങ്കിലും പ്രതിപക്ഷം ബഹളം വച്ചു.
ഗൗരവമേറിയ സംഭവത്തില്‍ നിസാരമായി കാണുന്നുവെന്നായിരുന്നു പ്രതിപക്ഷ ആരോപണം. ബഹളം ശക്തമായതോടെയാണ് മുഖ്യമന്ത്രി ഇടപെടുകയും അന്വേഷണം പ്രഖ്യാപിക്കുകയും ചെയ്തത്.