വെഞ്ഞാറമൂട്: നിയന്ത്രണം വിട്ട കാര്‍ ഇലക്ട്രിക് പോസ്റ്റ് തകര്‍ത്ത് സമീപത്തെ കടയിലേക്ക് ഇടിച്ചു കയറി രണ്ടു പേര്‍ക്ക് പരുക്ക്. പത്തനംതിട്ട കുളത്തുമന്‍, പുതുപറമ്പില്‍ ഹൗസില്‍ ഷൈല (55), സരോജനിയമ്മ (87) എന്നിവര്‍ക്കാണ് പരുക്കേറ്റത്. പുലര്‍ച്ചെ മൂന്നോടെ വെഞ്ഞാറമൂട് പെട്രോള്‍ പമ്പിന് സമീപത്താണ് അപകടം.
തിരുവനന്തുരം എയര്‍പോര്‍ട്ടില്‍ നിന്ന് പത്തനംതിട്ടയിലേക്ക് പോകുകയായിരുന്ന വാഹനമാണ് അപകടത്തില്‍പ്പെട്ടത്. ഇടിയുടെ ആഘാതത്തില്‍ വാഹനം എതിര്‍ദിശയിലേക്ക് തിരിഞ്ഞു പോയി. കെ.എസ്.ടി.പിയുടെ ഇലക്ട്രിക് പോസ്റ്റും, സമീപത്തെ കുന്നില്‍ ഹൈപ്പര്‍ മാര്‍ക്കറ്റിലെ മുന്നിലുണ്ടായിരുന്ന അലമാരയും അപകടത്തില്‍ തകര്‍ന്നു. പരുക്കേറ്റവരെ വെഞ്ഞാറമൂട് ശ്രീ ഗോകുലം മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.