കൊച്ചി: വനിതാ മതിലുമായി ബന്ധപ്പെട്ട് ജനങ്ങളെയും ഹൈക്കോടതിയേയും സര്‍ക്കാര്‍ തെറ്റിദ്ധരിപ്പിക്കുകയാണെന്ന് പ്രൊഫ. കെ.വി.തോമസ് എം.പി പറഞ്ഞു. വനിതാ മതിലിനു വേണ്ടി പണം ചിലവഴിക്കില്ലെന്ന് മുഖ്യമന്ത്രി പറഞ്ഞതിനു കടകവിരുദ്ധമായാണ് സര്‍ക്കാര്‍ ഹൈക്കോടതിയില്‍ സത്യവാങ്ങ്മൂലം സമര്‍പ്പിച്ചിരിക്കുന്നത്. വനിതാ ശാക്തികരണത്തിനായി ബഡ്ജറ്റില്‍ വകയിരുത്തിയിട്ടുള്ള 50 കോടി രൂപ സര്‍ക്കാരിന്റെ പ്രചാരണ പരിപാടിയായ മതിലിനു ചിലവിടുമെന്ന് പറയുന്നത് വിരോധാഭാസമാണ്.
വനിതാ ശാക്തികരണത്തിനു മറ്റു നിരവധി പദ്ധതികള്‍ ആവിഷ്‌കരിച്ചു നടപ്പിലാക്കാന്‍ കഴിയും. വനിതാ ശാക്തികരണത്തോട് മുഖ്യമന്ത്രിക്കും സര്‍ക്കാരിനും യഥാര്‍ത്ഥ പ്രതിപത്തി ഉണ്ടെങ്കില്‍ ആദ്യം ചെയ്യേണ്ടത് സംസ്ഥാനത്തെ ഓഖി പ്രളയ ബാധിത മേഖലകളിലെ സ്ത്രീകളുടെ സുരക്ഷിത ജീവിതത്തിനും ശാക്തികരണത്തിനും ആവശ്യമായ കാര്യങ്ങള്‍ ചെയ്യുക എന്നതാണ്.
പദ്ധതി വിഹിതം ചെലവഴിക്കാള്‍ ഇനിയും മൂന്നു മാസം ഉണ്ട് എന്നിരിക്കെ 50 കോടി സര്‍ക്കാര്‍ ഖജനാവില്‍ നിന്നു കൊള്ളയടിക്കാനാണ് ഇപ്പോഴത്തെ പരിപാടിയിലൂടെ ശ്രമിക്കുന്നത്. സ്ത്രീ ശാക്തികരണത്തിനായി മാറ്റിവച്ചിട്ടുള്ള 50 കോടി രൂപയില്‍ കേന്ദ്ര വിഹിതം ഉണ്ടെങ്കില്‍ സര്‍ക്കാര്‍ അക്കാര്യവും വ്യക്തമാക്കണമെന്ന് എം.പി പറഞ്ഞു.