വനിതകളുടെ 400 മീറ്ററില്‍ നിലവിലെ ഒളിംപിക് സ്വര്‍ണ ജേത്രിയേയും സുവര്‍ണ പ്രതീക്ഷകളായിരുന്ന താരങ്ങളേയും പിന്തള്ളി അമേരിക്കയുടെ ഫില്ലിസ് ഫ്രാന്‍സിസിന്റെ അട്ടിമറി മുന്നേറ്റം. നിലവിലെ ഒളിംപിക് സ്വര്‍ണ ജേത്രി ബഹാമാസിന്റെ ഷോനെ മില്ലര്‍ വിബോ, മെഡല്‍ പ്രതീക്ഷയുമായത്തെിയ യു.എസ്.എ താരവും നിലവിലെ ഒളിംപിക് വെള്ളി മെഡല്‍ ജേത്രിയുമായ അല്ലിസന്‍ ഫെലിക്‌സ്, ജമൈക്കയുടെ ഒളിംപിക് വെങ്കല മെഡല്‍ ജേത്രി ഷെറിക്ക ജാക്‌സന്‍ എന്നിവരെയെല്ലാം പിന്തള്ളിയാണ് കരിയറിലെ ഏറ്റവും മികച്ച സമയം കുറിച്ച് ഫില്ലിസ് താരമായത്. ബഹ്‌റൈന്‍ താരം സല്‍വ ഈദ് നസര്‍ വെള്ളി സ്വന്തമാക്കി. താരത്തിന്റെ രണ്ടാം സ്ഥാനത്തേക്കുള്ള വരവും അപ്രതീക്ഷിതമായിരുന്നു. ദേശീയ റെക്കോര്‍ഡിട്ട പ്രകടനമാണ് സല്‍വ പുറത്തെടുത്തത്. താരം 50.06 സെക്കന്‍ഡിലാണ് രണ്ടാം സ്ഥാനത്തെത്തിയത്. അല്ലിസന്‍ ഫെലിക്‌സ് 50.08 സെക്കന്‍ഡില്‍ വെങ്കലം നേടി. വിബോ നാലാമതും ഷെറിക്ക അഞ്ചാം സ്ഥാനത്തുമാണ് ഫിനിഷ് ചെയ്തത്. തുടക്കത്തില്‍ ഫെല്ലിക്‌സും വിബോയും മുന്നേറിയെങ്കിലും അവസാന 20 മീറ്ററില്‍ ഫില്ലിസ് വന്‍ കുതിപ്പ് നടത്തിയാണ് അട്ടിമറി സൃഷ്ടിച്ചത്. അവസാന നിമിഷത്തില്‍ നേരിട്ട പരുക്കിന്റെ വേവലാതികള്‍ വിബോയ്ക്ക് തിരിച്ചടിയാകുകയും ചെയ്തു. സല്‍വ ഫോട്ടോ ഫിനിഷിലാണ് ഫെല്ലിക്‌സിനെ പിന്തള്ളി വെള്ളി പിടിച്ചെടുത്തത്.