കൊച്ചി: നാളികേര ടെക്‌നോളജി മിഷന്റെ പ്രൊജക്ട് അപ്രൂവല്‍ കമ്മിറ്റി 31.34 കോടിയുടെ 30 പദ്ധതികള്‍ക്ക് അനുമതി നല്‍കി. നാളികേര വികസന ബോര്‍ഡ് ചെയര്‍മാന്‍ ഡോ.ബി.എന്‍.എസ് മൂര്‍ത്തിയുടെ അധ്യക്ഷതയില്‍ കൊച്ചിയില്‍ ചേര്‍ന്ന യോഗമാണ് തീരുമാനമെടുത്തത്.
എട്ടെണ്ണം ഗവേഷണ പദ്ധതികളും 22 എണ്ണം നാളികേര സംസ്‌കരണത്തിനും ഉല്‍പന്ന വൈവിധ്യവത്ക്കരണത്തിനുമുള്ളതാണ്. പ്രതിവര്‍ഷം 255 ലക്ഷം നാളികേരം സംസ്‌കരിക്കാന്‍ ശേഷിയുള്ള മൂന്ന് ഡെസിക്കേറ്റഡ് കോക്കനട്ട് പൗഡര്‍ യന്നിറ്റുകള്‍ക്കും പ്രതിവര്‍ഷം 45 ലക്ഷം നാളികേരം ചിരകി ശീതീകരിച്ച് സൂക്ഷിക്കുന്ന ഒരു യൂനിറ്റും പ്രതിവര്‍ഷം 96 ലക്ഷം നാളികേരം സംസ്‌കരിച്ച് ഡെസിക്കേറ്റഡ് കോക്കനട്ട് പൗഡറും വെര്‍ജിന്‍ കോക്കനട്ട് ഓയിലും ഉല്‍പ്പാദിപ്പിക്കാന്‍ ശേഷിയുള്ള രണ്ട് സംസ്‌കരണ യൂനിറ്റുകള്‍ക്കും അനുമതി ലഭിച്ചു.
കൂടാതെ 75 ലക്ഷം നാളികേരം സംസ്‌കരിക്കാന്‍ ശേഷിയുള്ള 2 ഇളനീര്‍ പ്രോസസിങ് യൂനിറ്റുകള്‍ക്കും പ്രതിവര്‍ഷം 135 ലക്ഷം നാളികേരം സംസ്‌കരിക്കാന്‍ ശേഷിയുള്ള രണ്ട് കോക്കനട്ട് ഓയില്‍ യൂനിറ്റുകള്‍ക്കും പ്രതിവര്‍ഷം 120 ലക്ഷം നാളികേരം സംസ്‌കരിക്കാന്‍ ശേഷിയുള്ള 4 കൊപ്ര ഡ്രയര്‍ യൂനിറ്റുകള്‍ക്കും പ്രതിവര്‍ഷം 41 ലക്ഷം നാളികേരം സംസ്‌കരിക്കാന്‍ ശേഷിയുള്ള 5 ബോള്‍ കൊപ്ര നിര്‍മാണ യൂനിറ്റുകള്‍ക്കും നാളികേര പൊടിയില്‍ നിന്ന് ഡയറ്ററി ഫൈബര്‍ ഉല്‍പ്പാദിപ്പിക്കുന്ന ഒരു യൂനിറ്റിനും പ്രതിവര്‍ഷം 9000 മെട്രിക് ടണ്‍ ചിരട്ടക്കരി ഉല്‍പ്പാദിപ്പിക്കുന്ന 2 ഷെല്‍ ചാര്‍ക്കോള്‍ യൂനിറ്റുകള്‍ക്കും അനുമതി നല്‍കി. കേരളത്തില്‍ പ്രതിദിനം 15,000 നാളികേരം സംസ്‌ക്കരിക്കാന്‍ ശേഷിയുള്ള ഒരു കോക്കനട്ട് ഓയില്‍ യൂനിറ്റിനും പ്രതിദിനം 12,000 നാളികേരം സംസ്‌കരിച്ച് ഡെസിക്കേറ്റഡ് കോക്കനട്ട് പൗഡറും വെര്‍ജിന്‍ കോക്കനട്ട് ഓയിലും ഉല്‍പ്പാദിപ്പിക്കാന്‍ ശേഷിയുള്ള സമഗ്ര സംസ്‌കരണ യൂനിറ്റിനും അനുമതി നല്‍കി.