പുത്തനത്താണി: കല്‍പകഞ്ചേരി പൊലിസ് സ്റ്റേഷന്‍ പരിധിയിലെ കടുങ്ങാത്തുകുണ്ടിലും പട്ടര്‍നടക്കാവിലും മോഷണം. കടുങ്ങാത്തുകുണ്ടില്‍ മൂന്ന് കടകളിലും പട്ടര്‍നടക്കാവില്‍ ഒരു വീട്ടിലുമാണ് മോഷണം നടന്നത്. മോഷ്ടാവിന്റെ ദൃശ്യം സി.സി.ടി.വി കാമറയില്‍ പതിഞ്ഞിട്ടുണ്ട്. മൂന്ന് കടകളുടെയും പൂട്ടും ഷട്ടറും ഗ്ലാസുകളും തകര്‍ത്തിട്ടുണ്ട്. കുറുകത്താണി സ്വദേശികളായ മുഹമ്മദ് കുട്ടിയുടെയും മുസ്തഫയുടെയും ഉടമസ്ഥതയിലുള്ള ഫെയ്മസ് ബേക്കറിയിലും കിഴക്കേപാറയിലെ അടിയാട്ടില്‍ ബാബുവിന്റെ ഫാത്തിമ ഹോം സെന്ററിലും മയ്യേരിച്ചിറ തെക്കനാട്ട് ഉണ്ണിയുടെ ഗ്രാന്റ് ഷോപ്പിലുമാണ് മോഷണം നടന്നത്. കടകളില്‍നിന്ന് പണം നഷ്ടപ്പെട്ടിട്ടുണ്ട്. പട്ടര്‍നടക്കാവ് മുട്ടിക്കാട് അച്ചമ്പാട്ട് ബീരാന്‍ കുട്ടിയുടെ വീട്ടിലാണ് മോഷണം നടന്നത്. മുന്‍ വശത്തെ രണ്ട് വാതിലുകള്‍ തകര്‍ത്താണ് മോഷ്ടാക്കള്‍ അകത്തുകയറിയത്. തൊട്ടിലില്‍ കിടക്കുകയായിരുന്ന ഇവരുടെ രണ്ടരവയസുള്ള കൊച്ചുമകന്റെ കാലിലും കഴുത്തിലുമണിഞ്ഞിരുന്ന രണ്ടര പവന്‍ സ്വര്‍ണാഭരണങ്ങള്‍ നഷ്ടപ്പെട്ടിട്ടുണ്ട്. കല്‍പകഞ്ചേരി എസ്.ഐ കെ.എസ് പ്രിയന്റെ നേതൃത്വത്തില്‍ പൊലിസ് സംഘം സംഭവസ്ഥലത്തെത്തി പരിശോധന നടത്തി. ഇക്കഴിഞ്ഞ ദിവസം തിരൂര്‍ പയ്യനങ്ങാടിയിലും വൈലത്തൂരിലും കാവപ്പുരയിലുമായി ഒറ്റരാത്രിയില്‍ പതിനഞ്ചോളം കടകളിലും പുത്തനത്താണിയിലെ രണ്ട് വസ്ത്രക്കടകളിലും മോഷണം നടന്നിരുന്നു. അന്വേഷണം ഊര്‍ജിതമാക്കിയിട്ടുണ്ടെന്ന് എസ്.ഐ പറഞ്ഞു.