മലപ്പുറം: ജില്ലയിലെ തദ്ദേശ സ്ഥാപനങ്ങള്‍ 2018-19 സാമ്പത്തിക വര്‍ഷത്തില്‍ ഇതുവരെ 48.95 ശതമാനം പദ്ധതി തുക ചെലവഴിച്ചതായി തദ്ദേശ സ്ഥാപനങ്ങളുടെ വാര്‍ഷിക പുരോഗതി അവലോകന യോഗത്തില്‍ അറിയിച്ചു. ജനറല്‍ വിഭാഗത്തില്‍ 58.58 ശതമാനവും എസ്.സി.എസ്.പി വിഭാഗത്തില്‍ 39.62 ശതമാനവും ടി.എസ്.പിയില്‍ 28.52 ശതമാനവും ചെലവഴിച്ചിട്ടുണ്ട്.
ഡിസംബര്‍ 31നു മുന്‍പായി 75 ശതമാനം പദ്ധതി നിര്‍വഹണം നടത്തണമെന്നു മന്ത്രി എ.സി മൊയ്തീന്‍ നിര്‍ദേശിച്ചു. ജില്ലാപഞ്ചായത്ത് 45.47 ശതമാനമാണ് ചെലവഴിച്ചത്. ഗ്രാമപഞ്ചായത്തുകള്‍ 51.28ഉം ബ്ലോക്ക് പഞ്ചായത്തുകള്‍ 52.31ഉം നഗരസഭകള്‍ 42.48ഉം ശതമാനം തുക വിനിയോഗിച്ചിട്ടുണ്ട്.
ഗ്രാമപഞ്ചായത്തുകളില്‍ കൂട്ടിലങ്ങാടി ഗ്രാമപഞ്ചായത്താണ് പദ്ധതി തുക ചെലവഴിക്കുന്നതില്‍ ഒന്നാംസ്ഥാനത്ത്. 82.49 ശതമാനം. നന്നംമുക്ക് 76 ശതമാനം, പുഴക്കാട്ടിരി 70.59 ശതമാനം, ചോക്കാട് 70.15 ശതമാനം, വേങ്ങര 65.85 ശതമാനം എന്നിങ്ങനെയാണ് തൊട്ടടുത്ത സ്ഥാനങ്ങളില്‍. 38.64 ശതമാനം മാത്രം പദ്ധതി തുക ചെലവഴിച്ച വാഴക്കാട് ഗ്രാമപഞ്ചായത്താണ് ഏറ്റവും പിറകില്‍. എടവണ്ണ 39.86 ശതമാനം, അങ്ങാടിപ്പുറം 40.09 ശതമാനം, പൂക്കോട്ടൂര്‍ 40.10 ശതമാനം, ചെറുകാവ് 40.40 ശതമാനം എന്നിങ്ങനെയാണ് കണക്ക്.
ബ്ലോക്ക് പഞ്ചായത്തുകളില്‍ പെരുമ്പടപ്പാണ് പദ്ധതി തുക ചെലവഴിക്കുന്നതില്‍ ഒന്നാം സ്ഥാനത്ത്. 80.57 ശതമാനം. താനൂര്‍ 65.99 ശതമാനം, കുറ്റിപ്പുറം 65.23 ശതമാനം എന്നിങ്ങനെ തൊട്ടടുത്ത സ്ഥാനങ്ങളിലുണ്ട്. 39.06 ശതമാനം മാത്രം പദ്ധതി തുക ചെലവഴിച്ച നിലമ്പൂര്‍ ബ്ലോക്കാണ് ഏറ്റവും പിറകില്‍. അരീക്കോട് ബ്ലോക്ക് 39.11 ശതമാനം, കാളികാവ് ബ്ലോക്ക് 43.20 ശതമാനം എന്നിങ്ങനെയാണ് മറ്റു ബ്ലോക്ക് പഞ്ചായത്തുകളിലെ കണക്ക്.
നഗരസഭകളില്‍ വളാഞ്ചേരിയും പെരിന്തല്‍മണ്ണയുമാണ് മുന്നില്‍. 56.34ഉം 50.96ഉം ശതമാനമാണ് യഥാക്രമം ഇവര്‍ ചെലവഴിച്ചത്. നിലമ്പൂര്‍ 34.67 ശതമാനം, തിരൂര്‍ 34.74 ശതമാനം എന്നിങ്ങനെയാണ് ഏറ്റവും പിറകില്‍.