കണ്ണൂര്‍: ഉരുവിനും കര്‍ഷകനും ഇന്‍ഷുറന്‍സ് പരിരക്ഷ നല്‍കുന്നതിനായി സംസ്ഥാന മൃഗസംരക്ഷണ വകുപ്പ് നടപ്പാക്കുന്ന ഗോസമൃദ്ധി പ്ലസ് പദ്ധതിക്ക് ജില്ലയില്‍ തുടക്കമായി. ക്ഷീരഗ്രാമമായ തില്ലങ്കേരി പഞ്ചായത്തില്‍ ജില്ലാ പഞ്ചായത്ത് പ്രസിഡന്റ് കെ.വി സുമേഷ് പദ്ധതി ഉദ്ഘാടനം ചെയ്തു. അഞ്ചു കോടി രൂപ ചിലവില്‍ സംസ്ഥാനത്ത് നടപ്പാക്കുന്ന പദ്ധതിയില്‍ ജില്ലക്കായി 35.69 ലക്ഷം രൂപയാണ് മാറ്റിവച്ചിരിക്കുന്നത്.
പശുവിനെയും കൃഷിക്കാരനെയും ഒരുമിച്ചു ഇന്‍ഷുര്‍ ചെയ്യുക എന്നതാണ് പദ്ധതിയുടെ ലക്ഷ്യം. രണ്ടു ലക്ഷം രൂപയാണ് ഇന്‍ഷുറന്‍സ് തുക. കര്‍ഷകന് അപകട മരണം, മറ്റു അപകടങ്ങള്‍ എന്നിവ സംഭവിച്ചാല്‍ ഇന്‍ഷുറന്‍സ് പരിരക്ഷ ലഭിക്കുന്നതോടൊപ്പം ഉരുവിന് അപകടം, രോഗം, മരണം എന്നിവ സംഭവിച്ചാലും ഇന്‍ഷുറന്‍സ് പരിരക്ഷ ലഭിക്കും. പശുവിന്റെ കറവ വറ്റുക, ഗര്‍ഭധാരണം നടക്കാതിരിക്കുക എന്നിവക്കും ഇന്‍ഷുറന്‍സ് പരിരക്ഷയുണ്ട്. പശുവിനെ ഇന്‍ഷുര്‍ ചെയുന്ന തുകയുടെ 75 ശതമാനമാണ് ഇത്തരം കേസുകളില്‍ കര്‍ഷകനു ലഭിക്കുക.
മൃഗാശുപത്രിയിലെ ഡോക്ടര്‍ മുഖേനയാണ് ഇന്‍ഷുര്‍ ചെയേണ്ടത്. ഒരു വര്‍ഷം, മൂന്നു വര്‍ഷം എന്നീ സ്‌കീമുകളാണ് നിലവിലുള്ളത്. ഒരു വര്‍ഷത്തേക്ക് 2.8 ശതമാനവും മൂന്നു വര്‍ഷത്തേക്ക് 6.53 ശതമാനവുമാണ് പ്രീമിയം തുക. കറവയുള്ളതോ ഗര്‍ഭിണികളോ ആയ പശുക്കള്‍, എരുമകള്‍ എന്നിവയെയാണ് പദ്ധതി പ്രകാരം ഇന്‍ഷുര്‍ ചെയുന്നത്. 50,000 വരെയുള്ള ഇന്‍ഷുറന്‍സുകള്‍ക്ക് പ്രീമിയം തുകയുടെ പകുതി തുക സര്‍ക്കാര്‍ വഹിക്കും. ജില്ലയില്‍ 3000 പശുക്കളെ പദ്ധതി പ്രകാരം ഇന്‍ഷുര്‍ ചെയ്യാനാണ് ലക്ഷ്യമിടുന്നത്. 18 മുതല്‍ 60 വയസുവരെയുള്ള കര്‍ഷകരെയാണ് സ്‌കീമില്‍ ഉള്‍പ്പെടുത്തുക.
തില്ലങ്കേരി പഞ്ചായത്ത് പ്രസിഡന്റ് പി.പി സുഭാഷ് അധ്യക്ഷനായി. സി. ഷൈമ, വി.കെ കാര്‍ത്യായനി, പി.കെ ശ്രീധരന്‍, ഡോ. സി.പി പ്രസാദ് പങ്കെടുത്തു.