മുംബൈ: ഏഷ്യാകപ്പിന്റെ ഇടവേളക്ക് പിന്നാലെ ടീമുകളുടെ മുഖം മിനുക്കാന്‍ ഐ.എസ്.എല്‍ ക്ലബുകള്‍. മികച്ച പ്രതിഫലം വാഗ്ദാനം ചെയ്താണ് ക്ലബുകള്‍ താരങ്ങളെ ടീമിലെത്തിക്കുന്നത്. ഡല്‍ഹി ഡൈനാമോസില്‍നിന്ന് കൂടുതല്‍ തുക മുടക്കി പ്രീതം കോട്ടാലിനെ എ.ടി.കെ സ്വന്തമാക്കി. നേരത്തെ എ.ടി.കെയിലായിരുന്ന പ്രീതം കഴിഞ്ഞ സീസണിലാണ് ഡല്‍ഹിയില്‍ എത്തിയത്. ഈ സീസണില്‍ ഐ ലീഗ് ക്ലബായ ഈസ്റ്റ് ബംഗാള്‍ പ്രീതത്തിനായി നീക്കം നടത്തിയെങ്കിലും ഡല്‍ഹിയില്‍ തുടരാന്‍ താല്‍പര്യം പ്രകടിപ്പിക്കുകയായിരുന്നു. മുന്‍ ബംഗളൂരു എഫ്.സി താരവും നിലവില്‍ ചൈനീസ് ലീഗില്‍ കളിക്കുന്ന എഡു ഗാര്‍സിയയേയും എ.ടി.കെ ടീമില്‍ എത്തിച്ചു. ജനുവരി ട്രാന്‍സ്ഫറില്‍ ഉള്‍പ്പെടുത്തിയാണ് ഗാര്‍സിയയെ കൊണ്ടു വന്നത്. ചൈനീസ് ക്ലബായ സെജിയാങ് ലൂചിങിന് വേണ്ടിയാണ് ഗാര്‍സിയ ഇപ്പോള്‍ കളിക്കുന്നത്. 97 ലക്ഷം രൂപയ്ക്കാണ് ബംഗളൂരുവില്‍നിന്ന് ഗാര്‍സിയ ചൈനീസ് ക്ലബിലെത്തിയത്.
ഈ സീസണ്‍ അവസാനം വരെ താരം എ.ടി.കെയില്‍ തുടരും. സ്പാനിഷ് ക്ലബായ റയല്‍ സരഗോസക്ക് വേണ്ടി കളിച്ച താരമാണ് ഗാര്‍സിയ.
ലോകകപ്പ് താരത്തെ ടീമിലെത്തിച്ച് ബ്ലാസ്റ്റേഴ്‌സ്
കൊച്ചി:മാറ്റത്തിനൊരുങ്ങുന്ന കേരള ബ്ലാസ്റ്റേഴ്‌സ് ലോകകപ്പ് താരത്തെ ടീമിലെത്തിച്ചു.
ഇന്ത്യക്കായി അണ്ടര്‍ 17 ലോകകപ്പില്‍ കളിച്ച നൊങ്ഡബ നൗറിനെയാണ് ബ്ലാസ്റ്റേഴ്‌സ് ടീമില്‍ എത്തിച്ചത്. ഐ ലീഗില്‍ മിനര്‍വ പഞ്ചാബിന് വേണ്ടി കളിക്കുകയായിരുന്നു നൗറിന്‍.
ആദ്യ സീസണില്‍ ഇന്ത്യന്‍ ആരോസിന് ബൂട്ടുകെട്ടിയ നൗറിന്‍ സീസണില്‍ മികച്ച പ്രകടനം നടത്തിയിരുന്നു.
രണ്ടര വര്‍ഷത്തെ കരാറിലാണ് മിനര്‍വയില്‍നിന്ന് ബ്ലാസ്റ്റേഴ്‌സിലേക്കുള്ള വരവ്.