കോട്ടക്കല്‍: ഭിന്നശേഷി കുട്ടികള്‍ക്കായി എടരിക്കോട് ഗ്രാമപഞ്ചായത്ത് നടത്തിയ ചിറകുള്ള കൂട്ടുകാര്‍ പരിപാടി ശ്രദ്ധേയമായി. വൈകല്യം മറന്ന് ആടിയും പാടിയും നൃത്തങ്ങള്‍ അവതരിപ്പിച്ചും പ്രത്യേക പരിഗണന അര്‍ഹിക്കുന്ന കുട്ടികള്‍ കലാപരിപാടികള്‍ അവതരിപ്പിച്ചത് നവ്യാനുഭവമായി.
2018 - 19 വാര്‍ഷിക പദ്ധതിയില്‍ ഉള്‍പെടുത്തിയാണ് എടരിക്കോട് ഗ്രാമപഞ്ചായത്ത് ഭിന്നശേഷി കുട്ടികള്‍ക്കായി ചിറകുള്ള കൂട്ടുകാര്‍ എന്ന പേരില്‍ കലാകായിക മത്സരങ്ങള്‍, രക്ഷാകര്‍തൃ ബോധനം, സ്‌നേഹാദരം എന്നിവ ഉള്‍കൊളളിച്ച് പരിപാടി സംഘടിപ്പിച്ചത്.
പി കെ എം എം ഹയര്‍ സെക്കന്‍ഡറി സ്‌കൂളില്‍ നടന്ന പരിപാടി ഇടി മുഹമ്മദ് ബഷീര്‍ എംപി ഉദ്ഘാടനം ചെയ്തു .പഞ്ചായത്ത് പ്രസിഡന്റ് ഷൈബ മണമ്മല്‍ അധ്യക്ഷയായി. പ്രമുഖ കലാകാരന്മാരായ ജസ്ഫര്‍ കോട്ടക്കുന്ന് (മൗത്ത് പൈന്റര്‍), അഷ്‌റഫ് തറയില്‍, ദേവരാജ് മുഖ്യാതിഥികളായി.
പഞ്ചായത്ത് വൈസ് പ്രസിഡന്റ് വി ടി സുബൈര്‍ തങ്ങള്‍, ജില്ലാ പഞ്ചായത്ത് മെമ്പര്‍ ഹനീഫ പുതുപ്പറമ്പ്, കെ പി നാസര്‍, റംല പൂക്കയില്‍, അലവി കഴുങ്ങില്‍, ആയിഷാബി ടീച്ചര്‍, സഫിയ മണ്ണിങ്ങല്‍ സംസാരിച്ചു