തൃശൂര്‍: പൊതു ജനങ്ങള്‍ക്ക് കൃഷിയിലെ ആധുനിക പ്രവണതകള്‍ പരിചയപ്പെടുത്തുന്നതിനും കാര്‍ഷിക പ്രശ്‌നങ്ങളില്‍ ശാസ്ത്രീയ ഉള്‍ക്കാഴ്ച നല്‍കുന്നതിനുമായി കേരള കാര്‍ഷിക സര്‍വകലാശാല സംഘടിപ്പിക്കുന്ന ദ്വിദിന പ്രഭാഷണ-സംവാദപരമ്പരക്ക് ഓഗസ്റ്റ് 25ന് തുടക്കമാകും.
കേരളത്തിലുടനീളം നടക്കുന്ന കൃഷിയുടെ പുനരുജ്ജീവനത്തിനുള്ള തീവ്രശ്രമങ്ങള്‍ക്ക് പിന്‍തുണ നല്‍കുകയെന്ന ലക്ഷ്യത്തോടെയാണ് കൃഷിശാസ്ത്ര സമീക്ഷ എന്ന ഈ പരമ്പര ആവിഷ്‌കരിച്ചിരിക്കുന്നതെന്ന് കാര്‍ഷിക സര്‍വകലാശാലാ വൈസ് ചാന്‍സലര്‍ ഡോ. പി. രാജേന്ദ്രന്‍ പറഞ്ഞു. 'കൃഷിയില്‍ തല്‍പ്പരരായവര്‍ക്ക് കൃഷിയെ കുറിച്ച് ശാസ്ത്രീയ ഉള്‍ക്കാഴ്ച്ച പകര്‍ന്നു നല്‍കുക എന്ന കടമയാണ് ഇതിലൂടെ ഉദ്ദേശിക്കുന്നത്.
കൃഷി, കൃഷി അനുബന്ധ മേഖലകളില്‍ തനതു സംഭാവനകള്‍ നല്‍കിയിട്ടുള്ള ശാസ്ത്രവിദഗ്ധരാണ് പ്രഭാഷണ-സംവാദ പരമ്പര കൈകാര്യം ചെയ്യുകയെന്ന് വിജ്ഞാന വ്യാപന ഡയറക്ടര്‍ ഡോ. ജിജു പി. അലക്‌സ് പറഞ്ഞു. വിവിധ വിഷയങ്ങളെക്കുറിച്ച് മുന്‍ കൂട്ടി നിശ്ചയിച്ച സമയ ക്രമമനുസരിച്ച് ചിട്ടപ്പെടുത്തിയ പ്രഭാഷണങ്ങളും സംവാദവും ആണ് ഓരോ രണ്ടു ദിവസത്തെ പരിപാടിയിലും ഉണ്ടാവുക. കാര്‍ഷിക സര്‍വകലാശാലയുടെ സെന്‍ട്രല്‍ ട്രെയിനിങ് ഇന്‍സ്റ്റിറ്റ്യൂട്ടിന്റെ ചുമതലയില്‍ മണ്ണുത്തിയിലെ കര്‍ഷക ഭവനത്തില്‍ നടക്കുന്ന പരിപാടിക്ക് തപാല്‍, ഫോണ്‍, ഇ മെയില്‍ വഴിയോ നേരിട്ടോ രജിസ്റ്റര്‍ ചെയ്യുന്ന ആദ്യത്തെ മുപ്പതു പേര്‍ക്കാണ് അവസരം ലഭിക്കുക.
താമസത്തിനും ഭക്ഷണത്തിനും ഉള്ള സൗകര്യങ്ങള്‍ ഉണ്ടായിരിക്കും. രജിസ്‌ട്രേഷനു ബന്ധപ്പെടേണ്ട വിലാസം: പ്രൊഫസര്‍ ആന്‍ഡ് ഹെഡ്, സെന്‍ട്രല്‍ ട്രെയിനിങ് ഇന്‍സ്റ്റിറ്റ്യൂട്ട്, കേരള കാര്‍ഷിക സര്‍വകലാശാല. മണ്ണുത്തി പി.ഒ, തൃശൂര്‍-680651. ഫോണ്‍: 0487 2371104.