ബിനുമാധവന്‍

നെയ്യാറ്റിന്‍കര: കോവളം-കാരോട് ബൈപ്പാസ് നിര്‍മാണം ഒച്ചിഴയും വേഗത്തിലെന്ന് പരക്കേ ആക്ഷേപം.
2016-ല്‍ ആണ് എല്‍.ആന്‍ഡ് ടി കമ്പനി ബൈപ്പാസിന്റെ നിര്‍മാണ കരാര്‍ ഏറ്റെടുക്കുന്നത്. നിര്‍മാണ പ്രവര്‍ത്തനം നാലാം വര്‍ഷത്തിലേയ്ക്ക് കടക്കുമ്പോഴും റോഡിന്റെ പൂര്‍ത്തീകരണം സ്വപ്നം കണ്ട് കഴിയുന്ന നാട്ടുകാര്‍ ആകെ നിരാശയിലാണ്.  എന്നാല്‍ കരാര്‍ ഏറ്റെടുത്ത് വര്‍ഷങ്ങള്‍ കഴിഞ്ഞിട്ടും പണി പൂര്‍ത്തീകരിക്കാന്‍ കഴിയാത്തതിനെത്തുടര്‍ന്ന് അടുത്തിടെ വീണ്ടും കരാര്‍ ആറ് മാസത്തേയ്ക്ക് കൂടി നിട്ടി കൊടുക്കുകയാണുണ്ടായത്. ഇതിന്റെ കാലാവധിയും ഡിസംബറില്‍ അവസാനിക്കുകയാണ്. ഇതോടുകൂടിയാണ് നാട്ടുകാര്‍ നിരാശയിലായത്. നിലവിലെ നിര്‍മാണ പ്രവര്‍ത്തനം പരിശോധിച്ചാല്‍ ഇനിയും ഈ ബൈപ്പാസിന്റെ നിര്‍മാണം പൂര്‍ത്തീകരിക്കുവാന്‍ വര്‍ഷങ്ങള്‍ വേണ്ടി വരും എന്നുള്ളതാണ് യാഥാര്‍ഥ്യം.
ബൈപ്പാസ് റോഡ് കടന്നു പോകുന്നതിന് സമീപമുള്ള ചെറുതും വലുതുമായ പഞ്ചായത്ത് റോഡുകളും പി.ഡബ്ല്യു.ഡി റോഡുകളും തകര്‍ന്ന് തരിപ്പണമായി സഞ്ചാര യോഗ്യമല്ലാത്ത തരത്തിലാണ് കിടക്കുന്നത്. ബൈപ്പാസ് നിര്‍മാണത്തിനാവശ്യമായ സാമഗ്രികളുമായി പോകുന്ന ടിപ്പറുകളുടെയും ഹെവി വാഹനങ്ങളുടെയും മരണപാച്ചിലാണ് റോഡുകളുടെ ദയനീയമായ തകര്‍ച്ചക്കിടയാക്കിയത്.
ദിനം പ്രതി ചെറുതും വലുതുമായ നിരവധി അപകടങ്ങളാണ് ഈ ഭാഗങ്ങളില്‍ നടക്കാറുള്ളത്. ഒപ്പം ജീവന്‍ അപഹരിച്ച സംഭവങ്ങളും നിരവധി.അടിപ്പാതയ്ക്കും മേല്‍പ്പാലത്തിനുമായി മുറിച്ച റോഡുകളു ടെ അവസ്ഥയും മറ്റൊന്നല്ല. മരപ്പാലം-വേങ്ങപ്പൊറ്റയിലെ മേല്‍പ്പാലം മാത്രമാണ് ഏകദേശം പണി പൂര്‍ത്തീകരിക്കാന്‍ കഴിഞ്ഞത്. എന്നാല്‍ ഈ പാലം യാത്രികര്‍ക്കായി തുറന്നു കൊടുക്കാന്‍ അധികൃതര്‍ക്ക് ഇനിയും കഴിഞ്ഞിട്ടില്ല. കൃഷി ഭൂമിയും കിടപ്പാടവും നഷ്ടപ്പെട്ട ഭൂ ഉടമകള്‍ നഷ്ടപരിഹാരത്തിനായി മുട്ടാത്ത വാതിലുകളില്ല. സമീപ റോഡുകളുടെ അവസ്ഥയും വളരെ ദയനീയമാണ്.
കാഞ്ഞിരംകുളം പ്ലാവിളയില്‍ അടിപ്പാത നിര്‍മാണം ഇനിയും തുടങ്ങിയിട്ടില്ല. കല്ലുമല-കൈവന്‍വിളയിലെ മേല്‍പ്പാലത്തിന്റെ പണിയും അവതാളത്തിലാണ്.
നിലവിലെ റോഡ് പൊട്ടി പൊളിഞ്ഞ് സഞ്ചാര യോഗ്യമല്ലാത്ത അവസ്ഥയിലാണ്. തിരുപുറം-മണ്ണക്കല്‍ റോഡിലെ അടിപ്പാതയുടെ നിര്‍മാണവും ഒച്ചിഴയും വേഗത്തിലാണ് നടക്കുന്നത്.
സമാന്തര റോഡുകളും സഞ്ചാര യോഗ്യമല്ല.ബൈപ്പാസ് റോഡ് നിര്‍മാണത്തിനായി സ്ഥലം കൈമാറിയ കാഞ്ഞിരംകുളം , ചെങ്കല്‍ , കോട്ടുകാല്‍ , തിരുപുറം , കാരോട് തുടങ്ങീ അഞ്ച് വില്ലേജുകളിലെ വസ്തുവിന്റെ വില നിര്‍ണയിക്കുന്നതിന് ജില്ലാ പര്‍ച്ചേസ് കമ്മിറ്റി വിളിച്ചു ചേര്‍ത്ത യോഗത്തില്‍ കമ്മിറ്റി തീരുമാനിച്ചുറപ്പിച്ച തുകയില്‍ വസ്തു ഉടമകള്‍ എഗ്രിമെന്റ് ഒപ്പുവച്ചിരുന്നു.
ഇതിന്‍ പ്രകാരം ഭൂമിയെ അഞ്ച് കാറ്റഗറിയായി തിരിക്കുകയും ഇതില്‍ എ കാറ്റഗറിയ്ക്ക് 5,25000 രൂപ എന്ന കണക്ക് നിശ്ചയിക്കുകയും ചെയ്തു.
എ കാറ്റഗറിയുടെ പത്ത് ശതമാനം കുറച്ചുള്ള തുകയാണ് മറ്റ് കാറ്റഗറികള്‍ക്ക് നല്‍കുക എന്നതായിരുന്നു തീരുമാനം. എന്നാല്‍ സ്റ്റേറ്റ് ലവല്‍ എംബവര്‍ കമ്മിറ്റി ഈ തീരുമാനം റദ്ദുചെയ്യുകയായിരുന്നു. ഇതോടുകൂടി 3,75000 രൂപയാണ് സെന്റ് ഒന്നിന് ഭൂ ഉടമകള്‍ക്ക് ലഭിച്ചത്.  നഷ്ടപരിഹാരം സമയബന്ധിതമായി ലഭിക്കാത്തതിനെ തുടര്‍ന്ന് ആക്ഷന്‍ കൗണ്‍സിലിന്റെ നേതൃത്വത്തില്‍ റോഡ് നിര്‍മാണം തടസപ്പെടുത്തി സമരം ചെയ്യുകയുണ്ടായി.  ഇതേതുടര്‍ന്ന് ജില്ലാ കലക്ടറെ ആര്‍ബിട്രേറ്ററായി ചുമതലപ്പെടുത്തുകയായിരുന്നു. ഇതിന് ശേഷമാണ് കാര്യങ്ങള്‍ ഒരു വിധം മുന്നോട്ടു പോയത്. എന്നാല്‍ റോഡ് പണി ഇഴയുന്ന കാര്യത്തില്‍ തന്നെയാണ് ജനങ്ങള്‍ക്ക് ആശങ്ക നിലനില്‍ക്കുന്നത്.