അന്തിക്കാട്: അന്തിക്കാട് പൊലിസ് സ്റ്റേഷനിലുളളിലേക്ക് അനുമതിയില്ലാതെ വാഹനം കടത്തി കാര്‍പോര്‍ച്ചു ഇടിച്ചിട്ട് നിര്‍ത്താതെ പോയ വാഹനം പൊലിസ് പിടികൂടി. അന്തിക്കാട് പൊലിസ് സ്റ്റേഷനില്‍ കഴിഞ്ഞ ദിവസം ഉച്ചയ്ക്കാണ് സംഭവം. പടിയം സ്വദേശി മേനോത്തുപറമ്പില്‍ ഷിബുവാണ് അനുമതിയില്ലാതെ സ്റ്റേഷന്‍ കോമ്പൗണ്ടില്‍ ജീപ്പോടിച്ചു കയറ്റിയത്. കൂടെ വന്ന സ്ത്രീ സ്റ്റേഷനകത്തേക്ക് പരാതി സംബന്ധമായ കാര്യത്തിന് കയറി പോയ സമയത്ത് ഇയാള്‍ വാഹനം അതിവേഗം പുറകോട്ടെടുത്ത് സ്റ്റേഷനിലെ കാര്‍പോര്‍ച്ചിലേക്ക് ഓടിച്ചു കയറ്റുകയായിരുന്നു. അശ്രദ്ധമായ ഡ്രൈവിങിനിടെ പോര്‍ച്ചിന്റെ തൂണ് ഇടിച്ചിട്ടാണ് വാഹനം നിന്നത്. ഇതിനിടെ തിരിച്ചെത്തിയ സ്ത്രീയേയും കൊണ്ട് ഷിബു പാഞ്ഞു പോകുകയായിരുന്നു. പാറാവുകാരന്‍ ഓടിയെത്തുമ്പോഴേക്കും കടന്നുകളഞ്ഞ ഇയാളെ പറ്റിയുള്ള വിവരങ്ങള്‍ സ്റ്റേഷനില്‍ മറ്റൊരു പരാതിക്കായി വന്ന പെരിങ്ങോട്ടുകര സ്വദേശി രതീഷാണ് നല്‍കിയത്. തുടര്‍ന്ന് അന്തിക്കാട് എസ്.ഐ സൂരജിന്റെ നേതൃത്വത്തിലുള്ള പൊലിസ് ഇയാളെ വാഹനം സഹിതം പിടികൂടുകയായിരുന്നു.