തിരുവനന്തപുരം: ശബരിമലയില്‍ പ്രവേശനത്തിനായി ചെന്നൈയില്‍ നിന്നെത്തിയ വനിതകളുടെ കൂട്ടായ്മയായ മനിതി സംഘത്തിന് പുലരുവോളം സുരക്ഷ നല്‍കി പമ്പയിലെത്തിച്ച പൊലിസും സര്‍ക്കാരും അവസാനം അവരെ കൈയൊഴിഞ്ഞു.
ശബരിമലയുമായി ബന്ധപ്പെട്ട കാര്യങ്ങളില്‍ ഹൈക്കോടതി നിയോഗിച്ച നിരീക്ഷണ സമിതിയാണ് തീരുമാനമെടുക്കേണ്ടതെന്ന് മന്ത്രി കടകംപള്ളി സുരേന്ദ്രന്‍ പറഞ്ഞതോടെ സര്‍ക്കാര്‍ തങ്ങളുടെ നിലപാടില്‍ വെള്ളം ചേര്‍ക്കുകയായിരുന്നു.
മനിതി സംഘത്തെ പമ്പയില്‍വരെ എത്തിക്കുന്നതിന് പരിശ്രമിച്ച ശേഷം പെട്ടെന്ന് പിന്മാറുകയും ഉത്തരവാദിത്തം ഹൈക്കോടതി നിയോഗിച്ച മൂന്നംഗ സമിതിയുടെ തലയില്‍ കെട്ടിവയ്ക്കുകയും ചെയ്തപ്പോള്‍ അതില്‍നിന്ന് തലയൂരി നിരീക്ഷക സംഘവും രംഗത്തെത്തി.ശബരിമലയിലെ അടിസ്ഥാന സൗകര്യങ്ങളുടെ കുറവ് പരിശോധിക്കുക മാത്രമാണ് തങ്ങളുടെ ചുമതലയെന്ന് നിരീക്ഷക സംഘം പറഞ്ഞതോടെ മനിതി സംഘം ഒറ്റപ്പെട്ടു. ആദ്യം സുരക്ഷ നല്‍കി മനിതി സംഘത്തെ പമ്പയില്‍ എത്തിക്കുകയും പൊടുന്നനെ ആ നിലപാടില്‍ നിന്നു പിന്മാറുകയും ചെയ്ത സര്‍ക്കാരിന്റെ നിലപാടാകട്ടെ പരക്കെ വിമര്‍ശനം ക്ഷണിച്ചുവരുത്തുകയും ചെയ്തു.
മാത്രമല്ല മനിതി സംഘത്തിന് പമ്പയില്‍ വരെ എത്താന്‍ സൗകര്യം ഒരുക്കിക്കൊടുത്തതിലൂടെ സര്‍ക്കാര്‍ ബി.ജെ.പി സമരത്തിന് ഊര്‍ജം നല്‍കുകയായിരുന്നുവെന്നും വിമര്‍ശനമുണ്ട്. ശബരിമല വിഷയത്തില്‍ മാത്രം മൂന്ന് ഹര്‍ത്താലുകള്‍ നടത്തി പൊതുസമൂഹത്തിന്റെ രൂക്ഷമായ വിമര്‍ശനം ഏറ്റുവാങ്ങുകയും സെക്രട്ടേറിയറ്റിനു മുന്നിലെ സമരം എങ്ങനെ തുടര്‍ന്നുകൊണ്ടുപോകുമെന്നറിയാതെ കുഴങ്ങി നില്‍ക്കുകയും ചെയ്യുന്ന ബി.ജെ.പിക്കും സംഘ്പരിവാര്‍ സംഘടനകള്‍ക്കും പിടിവള്ളിയാകുന്നതാണ് സര്‍ക്കാരിന്റെ ഈ നീക്കം എന്നും വിമര്‍ശനമുണ്ട്.
യുവതികളെ ശബരിമലയില്‍ പ്രവേശിപ്പിക്കാനാണെങ്കില്‍ പമ്പയില്‍ മതിയായ പൊലിസിനെ വിന്യസിക്കാതെ അവരെ കൊണ്ടുവന്നതെന്തിനെന്നും സംഘ്പരിവാര്‍ പ്രവര്‍ത്തകര്‍ക്ക് പ്രതിഷേധിക്കാനും അവരെക്കൊണ്ട് മനിതി സംഘത്തെ വിരട്ടി ഓടിക്കുന്നതിലേക്കും കാര്യങ്ങള്‍ എത്തിച്ചതെന്തിനെന്നുമുള്ള ചോദ്യങ്ങള്‍ സര്‍ക്കാരിനെയും സി.പി.എമ്മിനെയും പ്രതിക്കൂട്ടിലാക്കുന്നുണ്ട്.