പാണ്ടിക്കാട്: കൂട്ടുകുടുബങ്ങളായി തറവാട് വീടുകളില്‍ ഒന്നിച്ചുകഴിയുന്നവര്‍ക്കു വീടിനായി അപേക്ഷിക്കാന്‍ കഴിയുന്നില്ലെന്നു പരാതി. എല്ലാവര്‍ക്കും വീട് എന്ന സര്‍ക്കാര്‍ പദ്ധതിയായ ലൈഫ് മിഷനിിലൂടെ വീട് പണിയുന്നതിനാണ് സര്‍ക്കാര്‍ മാനദണ്ഡം കുരുക്കാകുന്നത്. റേഷന്‍ കാര്‍ഡില്‍ ഉള്‍പ്പെടുന്ന ഒരംഗം വീട്ടുടമയാണെങ്കില്‍ അതേ കാര്‍ഡില്‍ അംഗങ്ങളായ കുടുംബങ്ങളെയും ലൈഫ് പദ്ധതിയിലേക്കു പരിഗണിക്കാനാകില്ലെന്ന നിബന്ധനയാണ് വീടില്ലാത്ത കുടുബങ്ങള്‍ക്കു വിലങ്ങുതടിയാകുന്നത്.
ഈ നിബന്ധന കാരണം ജില്ലയില്‍ നൂറുകണക്കിനാളുകാണ് പ്രയാസത്തിലായിരിക്കുന്നത്. പാരമ്പര്യ സ്വത്ത് കിട്ടാനില്ലാത്തവര്‍, സ്വന്തം വീടില്ലാത്തവര്‍, ഭൂമിയും വീടും സ്വന്തമായി ഇല്ലാത്ത ആളുകള്‍ എന്നിവരാണ് ലൈഫ് മിഷന്‍ പദ്ധതിയില്‍ ഉള്‍പ്പെടുന്നത്. ഭൂമിയുള്ളവര്‍ക്കു വീടുവയ്ക്കാന്‍ സഹായവും ഭൂമിയില്ലാത്തവര്‍ക്കു ഭവന സമുച്ചയങ്ങള്‍ പണിതു താമസസൗകര്യമൊരുക്കലുമാണ് പദ്ധതിയില്‍ വിഭാവനം ചെയ്യുന്നത്. ഒരു റേഷന്‍ കാര്‍ഡില്‍ എത്ര അംഗങ്ങള്‍ ഉള്‍പ്പെടുന്നുണ്ടെങ്കിലും ഒരു കുടുബമായിട്ടാണ് ലൈഫ് പദ്ധതിയില്‍ കണക്കാക്കുക. കാര്‍ഡില്‍ ഉള്‍പ്പെടുന്ന ഒരംഗം വീട്ടുടമയാണെങ്കില്‍ മറ്റുള്ളവരെ ഭവനപദ്ധതിയില്‍ ഗുണഭോക്താവായി പരിഗണിക്കാനാകില്ലെന്നാണ് സമ്പൂര്‍ണ ഭവനനിര്‍മാണ പദ്ധതി മാര്‍ഗരേഖയില്‍ സര്‍ക്കാര്‍ നിര്‍ദേശിച്ചിരിക്കുന്നത്.
ഇക്കാലമത്രയും സര്‍ക്കാര്‍ നടപ്പാക്കിയ ഭവനനിര്‍മാണ പദ്ധതികളില്‍ ഒന്നിലും ഇത്തരം നിബന്ധനകള്‍ ഇടംപിടിച്ചിരുന്നില്ല. കുടുംബശ്രീയുടെ ആഭിമുഖ്യത്തില്‍ വീടുവീടാന്തരം സര്‍വേ നടത്തിയാണ്് വീടില്ലാത്ത കുടുംബങ്ങളെ കണ്ടെത്തി ലിസ്റ്റ് തയാറാക്കിയിരുന്നത്. ഇതിന്റെ കരട് പട്ടിക ഏതാനും ആഴ്ച മുന്‍പാണ് പ്രസിദ്ധീകരിച്ചത്. അര്‍ഹത നേടിയവരുടെയും അര്‍ഹരല്ലാത്തവരുടെയും വിവരങ്ങളടങ്ങിയ ലിസ്റ്റാണ് പ്രസിദ്ധീകരിച്ചത്.
റേഷന്‍ കാര്‍ഡില്‍ വീടുണ്ട് എന്നതാണ് നിരവധി കുടുബങ്ങളെ അര്‍ഹതാ ലിസ്റ്റില്‍നിന്നു പുറംതള്ളാനുള്ള കാരണമായി രേഖപ്പെടുത്തിയിട്ടുള്ളത്. വീടില്ലാത്ത അര്‍ഹരായ നിരവധി പേര്‍ ഗ്രാമസഭകളില്‍വച്ചു ലിസ്റ്റില്‍നിന്നു പുറത്തായതിന്റെ കാരണംതേടുമ്പോള്‍ വ്യക്തമായ മറുപടി നല്‍കാന്‍ അധികൃതര്‍ക്കാകുന്നില്ല.