മഞ്ചേരി:മെഡിക്കല്‍ കോളജ് വികസനത്തിനായി സ്ഥലം ഏറ്റെടുക്കുന്നതിനായി ഉടമകളുമായി ചര്‍ച്ച നടത്തുമെന്ന് മന്ത്രി കെ.കെ ശൈലജ പറഞ്ഞു. ആശുപത്രി വികസനത്തിന് സ്ഥല പരിമിതി പ്രശ്‌നമാണ്. ഇതിന് പരിഹാരമായി ന്യായവില നല്‍കി ഏഴ് ഏക്കര്‍ സ്ഥലം ഏറ്റെടുക്കാനാണ് സര്‍ക്കാര്‍ തീരുമാനം. പ്രദേശത്തെ രണ്ട് ഉടമകള്‍ ഇതുമായി സഹകരിക്കുന്നില്ല. പൊതുആവശ്യത്തിന് ഭൂമി വിട്ടുനല്‍കാന്‍ ഉടമകള്‍ മുന്നോട് വരികയാണ് വേണ്ടത്. തയാറാകാത്തപക്ഷം നിയമപരമായി ഭൂമി ഏറ്റെടുക്കാന്‍ സര്‍ക്കാര്‍ നിര്‍ബന്ധിതരാകേണ്ടി വരുമെന്നും മന്ത്രി പറഞ്ഞു.
മെഡിക്കല്‍ കോളേജിന്റെ വികസനത്തിന് മുന്തിയ പരിഗണനായാണ് സര്‍ക്കാര്‍ നല്‍കുന്നത്. ഫെബ്രുവരി ആദ്യത്തോടെ ആശുപത്രിയില്‍ ഹൃദ്രോഗ ചികില്‍സക്കായി കാത്ത് ലാബ് സംവിധാനം പ്രവര്‍ത്തന സജ്ജമാകും. ആത്യാഹിത വിഭാഗത്തിന്റെയും വാര്‍ഡുകളുടെയും നവീകരണത്തിന് രണ്ടു പദ്ധതികളിലായി ഒരുകോടി രൂപയുടെ പ്രവര്‍ത്തികള്‍ നടപ്പാക്കി. ആശുപത്രികളുടെ കെട്ടിടങ്ങളില്‍ റാമ്പ് നിര്‍മിക്കുന്നതിനായി 25 ലക്ഷം രൂപ അനുവദിച്ചു. കെട്ടിട നവീകരണത്തിന് ഒന്നരകോടിയുടെ പ്രവൃത്തികള്‍ നടപ്പാക്കി. ഐ.സിയു, ഗൈനക്കോളജി, പീഡിയാട്രിക്‌സ് വിഭാഗം സജീകരിക്കുന്നതിന് രണ്ടരകോടിയുടെ പ്രവൃത്തികള്‍ തുടങ്ങാനായി. രോഗീ സൗഹൃമാക്കുന്നതിന് ഒരുകോടി അനുവദിച്ചു. ആര്‍ദ്രം പദ്ധതിയില്‍ ഉള്‍പ്പെടുത്തി ഒ.പികള്‍ നവീകരിക്കുന്നതിന് 1.85 കോടി, അത്യാഹിത വിഭാഗം ഐ.സിയു ക്രമീകരണത്തിന് 85.32 ലക്ഷം, പുതിയ ഒ.പി ബ്ലോക്ക് നിര്‍മാണം, റേഡിയോളജി, ഇന്‍വെസ്റ്റിഗേഷന്‍ ബ്ലോക്ക് നിര്‍മാണത്തിനായി 8.60 കോടി, പുതിയ റസിഡന്‍സ് ക്വാര്‍ട്ടേസ് നിര്‍മാണത്തിനായി മൂന്ന് കോടിയും ആത്യാധുനിക ഇമേജിങ് സംവിധാനം ഒരുക്കാനായി 2.78 കോടിയും സ്‌റ്റോര്‍ കോംപ്ലക്‌സ് നിര്‍മ്മിക്കുന്നതിന് 2.50 കോടിയും അനുവദിച്ചു. അഗ്‌നിസുരക്ഷ സംവിധാനം ഒരുക്കാനായി ഒരു കോടിയുടെ, ബ്ലഡ് ബാങ്ക്, ലാബുകളുടെയും നവീകരണവും നടപ്പിലാക്കി. നിര്‍മ്മാണ പ്രവര്‍ത്തികള്‍ വേഗത്തിലാക്കാന്‍ നിര്‍ദേശം നല്‍കിയിട്ടുണ്ട്. പ്രവൃത്തികള്‍ പൂര്‍ത്തിയാകുന്നതോടെ ജില്ലയിലെ ആയിരങ്ങള്‍ക്ക് മികച്ച ചികിത്സാ മഞ്ചേരിയില്‍ നിന്നും ലഭ്യമാകുമെന്നും മന്ത്രി പറഞ്ഞു.