പടിഞ്ഞാറങ്ങാടി: ആലൂര്‍ സംവാദങ്ങള്‍ നടത്തിയും ഏതെങ്കിലും ഒരു പാര്‍ട്ടി സമ്മേളനം നടത്തി പോരായ്മകള്‍ ചൂണ്ടിക്കാണിക്കുമ്പോഴേക്കും അവര്‍ക്കെതിരേ വാക്കുകള്‍ കൊണ്ട് മത്സരിക്കാനല്ല രാഷ്ട്രീയ പാര്‍ട്ടികള്‍ തയ്യാറാകേണ്ടതെന്നും, മറിച്ച് ഏതെങ്കിലും ഒരു പാര്‍ട്ടി കാരുണ്യ പ്രവര്‍ത്തനങ്ങള്‍ ചെയ്യുകയാണെങ്കില്‍ അതിനോട് മത്സരിച്ച് അത് പോലോത്ത കാരുണ്യ പ്രവര്‍ത്തനങ്ങള്‍ ചെയ്തു മത്സരിക്കാനാണ് തയ്യാറാവേണ്ടതെന്നും, അതാണ് രാഷ്ട്രീയ പാര്‍ട്ടികളുടെ കടമയെന്നും യൂത്ത് ലീഗ് സംസ്ഥാന ട്രഷറര്‍ എം.എ സമദ് പറഞ്ഞു.
തിരഞ്ഞെടുപ്പുകളില്‍ ജയിക്കാന്‍ വേണ്ടി മാത്രം രാഷ്ട്രീയ പാര്‍ട്ടികള്‍ക്ക് വേണ്ടിയുളളതല്ല ജനങ്ങളെന്നും, ജനങ്ങള്‍ക്ക് വേണ്ടിയാണ് രാഷ്ട്രീയ പാര്‍ട്ടികള്‍ നിലകൊള്ളേണ്ടതെന്നും, ജനങ്ങളില്ലെങ്കില്‍ രാഷ്ട്രീയ പാര്‍ട്ടിയില്ലെന്നും അദ്ദേഹം പറഞ്ഞു.
ആലൂര്‍ ടൗണ്‍ മുസ്‌ലീം ലീഗ് കമ്മറ്റി പട്ടിത്തറ ജുമാ മസ്ജിദിന്ന് സമീപം കൊടക്കാഞ്ചേരി ശമീറക്ക് നിര്‍മിച്ച് നല്‍കുന്ന ബൈത്തുറഹ്മയുടെ സമര്‍പ്പണത്തോടനുബന്ധിച്ച് ആലൂര്‍ സെന്റെറില്‍ നടന്ന പൊതുസമ്മേളനത്തില്‍ പങ്കെടുത്ത് സംസാരിക്കുകയായിരുന്നു അദ്ദേഹം.
ടി.ടി അബ്ദുല്ലക്കുട്ടി മുസ്ലിയാരുടെ നേതൃത്വത്തില്‍ മുഹമ്മദലി ശിഹാബ് തങ്ങളുടെ നാമധേയത്തില്‍ നിര്‍മിച്ച ബൈത്തുറഹ്മയില്‍ പ്രാര്‍ഥനാസംഗമം നടത്തി. ആലൂര്‍ സെന്ററില്‍ നടന്ന പൊതുസമ്മേളനത്തില്‍ എം.എ സമദ് വീടിന്റെ താക്കോല്‍ ഷെമീറയുടെ മക്കള്‍ക്ക് കൈമാറി.
സിദ്ധീഖലി രാങ്ങാട്ടൂര്‍, സുബൈര്‍ കൊഴിക്കര മുഖ്യപ്രഭാഷണം നടത്തി. ഫാല്‍ക്കണ്‍ ബാവ, വി.പി മുഹമ്മദ് ബഷീര്‍, യു. ഹൈദ്രോസ്, പി.ഇ സലാം, അബ്ദു ചോലയില്‍, ടി. അസീസ്, പാദുക നൗഷാദ്, പി.വി ഷാജി, ടി. മാനു, പി. മുഹമ്മദുണ്ണി മാസ്റ്റര്‍, പി.വി ഇഖ്ബാല്‍, ഫാല്‍ക്കണ്‍ നാസര്‍, വി. യൂസഫ്, എം.വി അഷ്‌റഫ്, യൂസഫ് ഹാജി പങ്കെടുത്തു.