വടകര/മുക്കം: മടപ്പള്ളിയിലും മുക്കത്തിനടുത്ത മുത്തേരിയിലും സ്വകാര്യബസ് കാറിലിടിച്ചു നിയന്ത്രണംവിട്ട് മറിഞ്ഞ് 35 പേര്‍ക്ക് പരുക്കേറ്റു. മടപ്പള്ളിയിലുണ്ടായ അപകടത്തില്‍ പരുക്കേറ്റ കാര്‍ യാത്രക്കാരിയുടെയും അഞ്ചു ബസ് യാത്രക്കാരുടെയും നില ഗുരുതരമാണ്. ഇന്നലെ ഉച്ചയ്ക്ക് പന്ത്രണ്ടോടെയാണ് സംഭവം. തലശ്ശേരിയില്‍നിന്ന് വടകരയിലേക്ക് വരികയായിരുന്ന കെ.എല്‍ 18 സി 9540 'ഷര്‍മിള' ബസാണ് അപകടത്തില്‍പെട്ടത്. എതിരേ വരികയായിരുന്ന കെ.എല്‍ 18 ജി 4761 നമ്പര്‍ കാറില്‍ ഇടിച്ചശേഷം നിയന്ത്രണം നഷ്ടമായ ബസ് റോഡരികിലേക്ക് മറിയുകയായിരുന്നു. അമിത വേഗതയിലെത്തിയ ബസ് സ്റ്റോപ്പില്‍ നിര്‍ത്താന്‍ ശ്രമിക്കുന്നതിനിടെയാണ് കാറില്‍ ഇടിച്ചത്.
അപകടത്തില്‍ കാര്‍ യാത്രക്കാരി വടകര നാരായണനഗരം കല്ലൂഹൗസില്‍ പ്രഭാവതിക്ക് (62) ഗുരുതരമായി പരുക്കേറ്റു. ഇവരെ കോഴിക്കോട് സ്വകാര്യ ആശുപത്രിയില്‍ പ്രവേശിപ്പിച്ചിരിക്കുകയാണ്. ഗുരുതര പരുക്കേറ്റ ബസ് യാത്രക്കാരായ നാലു പേരെ വടകരയില്‍ പ്രാഥമിക ചികിത്സയ്ക്ക് ശേഷം കോഴിക്കോട് മെഡിക്കല്‍ കോളജിലേക്ക് മാറ്റി. നാട്ടുകാരും പൊലിസും ഫയര്‍ഫോഴ്‌സും ചേര്‍ന്നാണ് ബസില്‍നിന്ന് ആളുകളെ പുറത്തെടുത്തത്.
ഇന്നലെ ഉച്ചയ്ക്ക് 12.45നാണ് മുത്തേരിയില്‍ ബസ് അപകടത്തില്‍പെട്ടത്. ഓമശ്ശേരിയില്‍നിന്ന് മുക്കത്തേക്ക് വരികയായിരുന്ന 'ആക്ട്രസ് ' ബസ് മുത്തേരിയിലെ വളവില്‍ എതിരേവന്ന നാനോ കാറില്‍ തട്ടിയ ശേഷം നിയന്ത്രണംവിട്ട് റോഡരികിലെ വൈദ്യുതിത്തൂണില്‍ ഇടിച്ച് മറിയുകയായിരുന്നു. സംഭവത്തില്‍ 15 പേര്‍ക്ക് പരുക്കേറ്റു. ആരുടെയും നില ഗുരുതരമല്ല.
വൈദ്യുതിത്തൂണ്‍ തകര്‍ത്ത് സമീപത്തെ മരത്തില്‍ ഇടിച്ചാണ് ബസ് നിന്നത്. അമിത വേഗതയില്‍ വന്ന ബസിന് നിയന്ത്രണം നഷ്ടമായതോടെ എതിരേവരികയായിരുന്ന നാനോ കാറിന്റെ പിന്‍ഭാഗത്ത് തട്ടുകയായിരുന്നുവെന്ന് ദൃക്‌സാക്ഷികള്‍ പറഞ്ഞു. ഇടിയുടെ ആഘാതത്തില്‍ നാനോ കാര്‍ സമീപത്തെ പറമ്പിലേക്ക് വീഴുകയും ചെയ്തു. ഉച്ച സമയമായതിനാല്‍ ബസില്‍ യാത്രക്കാര്‍ കുറവായതും റോഡില്‍ മറ്റു വാഹനങ്ങള്‍ ഇല്ലാതിരുന്നതും വന്‍ ദുരന്തം ഒഴിവാക്കി. വൈദ്യുതി പ്രവാഹമുണ്ടാകാതിരുന്നതും അപകടത്തിന്റെ വ്യാപ്തി കുറച്ചു.
മടപ്പള്ളി അപകടത്തില്‍ ഗുരുതരമായി പരുക്കേറ്റ് കോഴിക്കോട് മെഡിക്കല്‍ കോളജ് ആശുപത്രിയില്‍ ചികിത്സയിലുള്ളവര്‍: മടപ്പള്ളിയിലെ കൈപ്പുറത്ത് ശ്രീധരി (57), കൈപ്പുറത്ത് കമല (63), ചോമ്പാല പുറത്തെ കയ്യില്‍ ശിവന്യ (6), സുരേഖ (31), അടക്കാതെരുവിലെ തെക്കയില്‍ നാരായണന്‍ (62). വടകരയിലെ സ്വകാര്യ ആശുപത്രിയില്‍ ചികിത്സയിലുള്ളവര്‍: പാനൂര്‍ സ്വദേശി ബാലന്‍ (74), പുന്നോല്‍ സ്വദേശികളായ ശരണ്യ (19), നിമിഷ (26), കോറോത്ത് റോഡ് ലത്തീഫ് (35), കെ.ടി ബസാര്‍ സ്വദേശികളായ നിഖില (36), റിയ (13), ഓര്‍ക്കാട്ടേരി സ്വദേശികളായ ജിഷ (30), ശിവാനി (8), വടകര അടക്കാതെരുവ് സ്വദേശി അഭിനവ് (22), മടപ്പള്ളി കോളജിന് സമീപത്തെ ജിതേഷ് (30), നാദാപുരം റോഡില്‍ ശ്രീജിത്ത് (38), തിരുവള്ളൂരിലെ രജിത (29). വടകര വീരഞ്ചേരി ന്യൂ നെസ്റ്റിലെ പ്രേമരാജിനെ (51) ജില്ലാ ആശുപത്രിയിലും പ്രവേശിപ്പിച്ചു.
മുത്തേരി അപകടത്തില്‍ പരുക്കേറ്റവര്‍: ഗോപിഷ് (28), ഗോപാലന്‍ (55), ഷാമില (30), ജസീല (40), ആയിഷ ഷെറിന്‍ (34), അജീഷ് (32), കദീജ (50), ജുമൈല (40), ഇഖ്ബാല്‍ (45), ഷാനിബ (32), ജമീല (31), വിനോദ് (55), രാമന്‍കുട്ടി (65), ചക്കി, അബൂബക്കര്‍. ഇവരെ ഓമശ്ശേരിയിലെ സ്വകാര്യ ആശുപത്രിയിലും മാമ്പറ്റ കെ.എം.സി.ടി മെഡിക്കല്‍ കോളജിലും പ്രവേശിപ്പിച്ചു.