ന്യൂയോര്‍ക്ക്: റോഹിംഗ്യന്‍ മുസ്‌ലിംകള്‍ക്കെതിരായ മ്യാന്‍മറിന്റെ നീക്കത്തിനെതിരേ കമ്മിഷന്‍ റിപ്പോര്‍ട്ട്. സര്‍ക്കാര്‍ നിയോഗിച്ച കമ്മിഷനാണ് റിപ്പോര്‍ട്ട് സമര്‍പ്പിച്ചിരിക്കുന്നത്. റോഹിംഗ്യകള്‍ക്കെതിരേയുള്ള സര്‍ക്കാര്‍ നിയന്ത്രണങ്ങളും അവരുടെ പൗരത്വത്തെ ചോദ്യം ചെയ്തുകൊണ്ടുള്ള പീഡനങ്ങളും അവസാനിപ്പിക്കണം. റാഖൈന്‍ ഉള്‍പ്പെടെയുള്ള പ്രദേശങ്ങളില്‍ സമാധാനം കൊണ്ടു വരാനുള്ള മാര്‍ഗം ഇതുമാത്രമാണെന്ന് മുന്‍ യു.എന്‍ സെക്രട്ടറി കോഫി അന്നന്‍ തലവനായുള്ള കമ്മിഷന്‍ രേഖപ്പെടുത്തി.
മ്യാന്മറിലെ 1.1 മില്യന്‍ റോഹിംഗ്യകള്‍ക്കെതിരേ സൈനികരും ബുദ്ധമതവിഭാഗക്കാരും നടത്തുന്ന ആക്രമണത്തിന് പരിഹാരം കാണാനായി കഴിഞ്ഞ വര്‍ഷമാണ് മ്യാന്‍മര്‍ സ്റ്റേറ്റ് കൗണ്‍സിലര്‍ ആങ് സാന്‍ സൂചി സ്വതന്ത്ര്യ കമ്മിഷനെ നിയമിച്ചത്. ഇന്നലെയാണ് കമ്മിഷന്‍ റിപ്പോര്‍ട്ട് പുറത്തുവിട്ടത്. കമ്മിഷന്റെ നിര്‍ദേശങ്ങള്‍ നടപ്പിലാക്കുമെന്ന് സൂചി മുന്‍പ് സൂചിപ്പിച്ചിരുന്നു. അതിനാല്‍ റോഹിംഗ്യകള്‍ക്കെതിരേയുള്ള അതിക്രമങ്ങളില്‍ മാറ്റംവരുമെന്നാണ് മനുഷ്യാവകാശ സംഘടനകള്‍ വിലയിരുത്തുന്നത്. മ്യാന്‍മറിലെ പടിഞ്ഞാറന്‍ പ്രദേശത്ത് അധിവസിക്കുന്ന റോഹിംഗ്യകള്‍ക്കും മുസ്‌ലിംകള്‍ക്കുമിടയിലെ പ്രശ്‌നങ്ങളാണ് കമ്മിഷന്‍ പ്രധാനമായും നിരീക്ഷിച്ചത്. സ്വന്തമായി രാജ്യമില്ലാത്ത ലോകത്തിലെ ഏറ്റവും വലിയ സമൂഹമാണ് റോഹിംഗ്യകള്‍. നിലവിലെ പ്രശ്‌നങ്ങള്‍ ശാശ്വതമായി പരിഹരിച്ചിട്ടില്ലെങ്കില്‍ രണ്ടു സമൂഹത്തിനുമിടയിലെ ഭിന്നതകള്‍ രൂക്ഷമാവാന്‍ ഇടയാക്കുമെന്ന് ഒന്‍പത്അംഗ കമ്മിഷന്‍ കണ്ടെത്തി.
റോഹിംഗ്യകള്‍ക്കെതിരേയുള്ള പീഡനങ്ങള്‍ ഗൗരവമായി പരിഗണിച്ചിട്ടില്ലെങ്കില്‍ പ്രതിസന്ധികള്‍ രൂക്ഷമാകും. ഇത് രാജ്യത്തിനെതിരേയുള്ള ഭീകരവാദപ്രവര്‍ത്തനത്തിലേക്ക് നയിക്കുമെന്ന് റിപ്പോര്‍ട്ടില്‍ പറയുന്നു. മറ്റു സമുദായങ്ങള്‍ക്കിടയിലെ നിയന്ത്രണങ്ങള്‍ ഉടന്‍ നീക്കണമെന്ന പ്രധാന നിര്‍ദേശവും കമ്മിഷന്‍ മുന്നോട്ടുവച്ചു. 120,000 ജനങ്ങള്‍ ദുരിത പൂര്‍ണമായി അവസ്ഥയില്‍ കഴിയുന്ന അഭയാര്‍ഥി ക്യാംപുകള്‍ ഉടന്‍ അടച്ചുപൂട്ടണമെന്ന് നിര്‍ദേശിച്ചിട്ടുണ്ട്.
റോഹിംഗ്യകളോടുള്ള സുരക്ഷാ സൈനികരുടെ നിലപാടുകള്‍ക്കെതിരേ കമ്മിഷന്‍ രംഗത്തെി. സൈനികരുടെ ഏകപക്ഷീയ നിലപാടുകള്‍ മുന്‍പും വിമര്‍ശനത്തിനിടയാക്കിയിട്ടുണ്ട്. ഒരു വിഭാഗത്തെ മാത്രം കേന്ദ്രീകരിച്ചുള്ള ഗ്രാമങ്ങളുടെ ഒഴിപ്പിക്കല്‍ ഓപറേഷന്‍ ഉള്‍പ്പെടെയുള്ള പദ്ധതികള്‍ സുരക്ഷാ സൈന്യം നേതൃത്വം നല്‍കിയിരുന്നു. മനുഷ്യാവകാശം രാജ്യത്ത് സംരക്ഷിക്കപ്പെടുന്നില്ല. രാഷ്ട്രീയമായും സാമ്പത്തികമായും ജനങ്ങള്‍ വേര്‍തിരിക്കപ്പെട്ടിട്ടുണ്ട്. റാഖൈനിനെ ഒറ്റപ്പെടുത്തുന്ന സമീപനങ്ങള്‍ ഗുരുതര പ്രത്യാഘാതങ്ങള്‍ രാജ്യത്തുണ്ടാക്കുമെന്ന് കമ്മിഷന്‍ മുന്നറിയിപ്പ് നല്‍കി.
റോഹിംഗ്യകള്‍ക്ക് പൗരത്വം നിഷേധിച്ചുകൊണ്ടുള്ള 1982 നിയമമാണ് നിലവിലെ മ്യാന്‍മറിലെ പ്രതിസന്ധികള്‍ക്ക് കാരണം. ഇവര്‍ താമസിക്കുന്ന പ്രദേശങ്ങളില്‍ മാധ്യമങ്ങള്‍ക്ക് പോലും സര്‍ക്കാര്‍ അനുമതി നിഷേധിച്ചിട്ടുണ്ട്. പൗരത്വ നിഷേധ നിയമം കഴിഞ്ഞ ഒക്ടോബര്‍ മുതല്‍ കടുത്ത രീതിയില്‍ നടപ്പാക്കാനുള്ള സൈനിക നീക്കങ്ങളാണ് പ്രതിസന്ധികള്‍ ഇത്രയും രൂക്ഷമാക്കിയത്. ബംഗ്ലാദേശില്‍ നിന്ന് കുടിയേറിയവരാണ് റോഹിംഗ്യകള്‍ എന്നും അവര്‍ രാജ്യത്തെ പൗരന്മാരല്ലെന്നുമാണ് സൈനിക നിലപാട്.
കമ്മിഷന്‍ റിപ്പോര്‍ട്ട് സമര്‍പ്പിക്കാനായി കോഫി അന്നന്‍ റാഖൈന്‍ ഉള്‍പ്പെടെയുള്ള പ്രദേശങ്ങള്‍ സന്ദര്‍ശിച്ചിട്ടുണ്ട്.സൂചിയുടെയും മ്യാന്‍മര്‍ സൈനിക മേധാവി മിന്‍ ആങ് ഹ്ലൈങിന്റെയും സാന്നിധ്യത്തിലാണ് കോഫി അന്നന്‍ റിപ്പോര്‍ട്ട് സമര്‍പ്പിച്ചത്.