ഇന്ധനവില വര്‍ധനയില്‍ പ്രതിഷേധമില്ല, സമരങ്ങളില്ല. ഇതു തന്നെയായിരുന്നോ ഇന്ധനവില നിര്‍ണയം ദിനേനയാക്കിയതിനു പിന്നിലുള്ള സര്‍ക്കാര്‍ ലക്ഷ്യമെന്നു വ്യക്തമാക്കുന്നതാണ് ഈയിയെടുണ്ടായ വിലവര്‍ധന. പുതിയ വില നിര്‍ണയ രീതി പ്രഖ്യാപിച്ച ജൂലൈ ഒന്നു മുതല്‍ ഇതുവരെ പെട്രോള്‍ ലിറ്ററിന് 5.64 രൂപയും ഡീസല്‍ ലിറ്ററിന് 3.72 രൂപയുമാണ് വര്‍ധിച്ചത്.

ഇത്തരത്തിലുള്ള വലിയ വര്‍ധനകളുണ്ടാവുമ്പോള്‍ മുമ്പ് നിരവധി സമരങ്ങള്‍ നടന്നിരുന്നു. എന്നാല്‍ ജൂലൈ ഒന്നു മുതല്‍ ഇതുവരെ വില വര്‍ധിച്ചതോ കുത്തനെ കൂടിയതോ ഒന്നും അറിഞ്ഞതേയില്ല.

ജൂലൈ ഒന്നു വരെ രണ്ടാഴ്ചയില്‍ ഒരിക്കലായിരുന്നു വില നിര്‍ണയം. അത് എടുത്തുമാറ്റിയാണ് കേന്ദ്രസര്‍ക്കാരിന്റെ പുതിയ തീരുമാനം. ഈ വിലനിര്‍ണയ രീതിക്കെതിരെ എണ്ണ വിതരക്കാരുടെ ഭാഗത്തുനിന്ന് സമരം ഉണ്ടായതൊഴികെ മറ്റു പ്രതിഷേധങ്ങളൊന്നുമുണ്ടായില്ല.

ഓരോ ദിവസവും വില പുനര്‍നിര്‍ണയിക്കുന്നതിനാല്‍ ചെറിയ വര്‍ധനകള്‍ ജനങ്ങള്‍ അറിയുന്നില്ല. ഇത് മുതലെടുക്കാനും കമ്പനികള്‍ക്കാവുന്നുണ്ടെന്നാണ് നിരീക്ഷകര്‍ പറയുന്നത്.

ദിനേനയുള്ള ഇന്ധനവില അറിയാന്‍

Fuel@IOC എന്ന മൊബൈല്‍ ആപ്പിലൂടെ ദിനേനയുള്ള ഇന്ധനവില, ഓരോ നഗരത്തിലെയും വേര്‍തിരിച്ച് ലഭ്യമാണ്. ഗൂഗിള്‍ പ്ലേ സ്റ്റോറിലും ആപ്പിള്‍ സ്റ്റോറിലും ആപ്പ് ഉണ്ട്. SmartDriveഎന്ന പേരില്‍ ബി.പി.സി.എല്ലിന്റെയും MYHPCL എന്ന എച്ച്.ബിയുടെയും ആപ്പിലൂടെയും വില നിലവാരം അറിയാം.