കഠിനംകുളം: ഓണം വാരാഘോഷത്തോട് മുന്നോടിയായി തിരുവനന്തപുരം നഗരസഭ സംഘടിപ്പിച്ചിരിക്കുന്ന ഓണനിലാവ് 2017ന് ഇന്ന് കഴക്കൂട്ടം വേദിയാകും.
വൈകിട്ട് നാലിന് വെട്ടുറോഡ് ദേശീയ പാത വഴി നീങ്ങുന്ന ഓണം വിളംബരം ഘോഷയാത്രയില്‍ മുത്തുക്കുട, ബാന്റ് മേളം, ചെണ്ടമേളം, ശിങ്കാര മേളം, തിരുവാതിര, തെയ്യം, പൂക്കാവടി, പാവക്കൂത്ത്, കരാട്ടെ, റോളര്‍ സ്‌കേറ്റിംങ്, മാജിക്ക് തുടങ്ങി വ്യത്യസ്തങ്ങളായ കലാപരിപാടികളും കലാരൂപങ്ങളും അണിനിരക്കും. സായിയിലെ കായിക താരങ്ങളുടെയും സ്റ്റുഡന്റ്‌സ് കേഡറ്റുകളുടെയും മാര്‍ച്ച് പാസ്റ്റ് ,കുടുംബശ്രീ റസിഡന്റ്‌സ് അസോസിയേഷനുകളുടെ വിവിധ കലാപരിപാടകളും കോര്‍ത്തിണക്കിയ ആയിരങ്ങള്‍ അണിനിരക്കുന്ന ഘോഷയാത്ര വൈകിട്ട് 5.30 ഓടെ കഴക്കൂട്ടം ജങ്ഷനില്‍ സമാപിക്കും.
തുടര്‍ന്ന് നടക്കുന്ന സാംസ്‌ക്കാരിക സമ്മേളനം മന്ത്രി തോമസ് ഐസക്ക് ഉദ്ഘാടനം ചെയ്യും.മന്ത്രി കടകംപള്ളി സുരേന്ദ്രന്‍ സുരേന്ദ്രന്‍, മേയര്‍ വി.കെ.പ്രശാന്ത് ഗായകന്‍ വേണുഗോപാല്‍ ഡെപ്യൂട്ടി മേയര്‍ രാഖീ രവികുമാര്‍ പങ്കെടുക്കും.
എഴിന് മാജിക്ക് പ്ലാനെറ്റ് വേദിയില്‍ മാജിക്ക് ഷോ അവതരിപ്പിക്കും. തുടര്‍ന്ന് കോട്ടയം മെഗാ ബീറ്റ്‌സ് ഗാനമേള അവതരിപ്പിക്കും.കേരള സര്‍ക്കാറും തിരുവനന്തപുരം നഗരസഭയും കഴക്കൂട്ടം പ്രസ്സ് ക്ലബും സംയുക്തമായി സംഘടിപ്പിക്കുന്ന ഓണം വാരാഘോഷം സെപ്റ്റംബര്‍ നാല് മുതല്‍ ഒന്‍പത് വരെ കഴക്കൂട്ടം പഴയ മഹാദേവ തിയേറ്റര്‍ കോബൗണ്ടില്‍ നടക്കും.
സെപ്റ്റംബര്‍ ഒന്നാം തിയതി വൈകിട്ട് ആറിന് ഗ്രീന്‍ഫീല്‍ഡിലെ ഓണാഘോഷ പരിപാടിക്ക് മന്ത്രി കടകംപള്ളി തിരിതെളിക്കും. ആഘോഷ കമ്മിറ്റി ചെയര്‍മാന്‍ കൂടിയായ മേയര്‍ വി.കെ.പ്രശാന്ത് അദ്ധ്യക്ഷനാകും.
സെപ്റ്റംബര്‍ 12ന് സമാപിക്കുന്ന പരിപാടിയില്‍ എല്ലാം ദിവസവും ഉച്ചക്ക് മൂന്ന് മുതല്‍ രാത്രി 10 വരെയാണ്. അലങ്കാര വര്‍ണമത്സ്യ പ്രദര്‍ശനം, അമ്യൂസ്‌മെന്റുകള്‍, നാടര്‍ മലബാര്‍ ഭക്ഷ്യമേള, പായസ മേള, ഓണം ട്രേഡ് ഫെയര്‍, പ്രദര്‍ശന വിപണനമേള എന്നിവ ഒരുക്കിയിട്ടുണ്ട്.
നടന്‍ മധുവിനെ കഴക്കൂട്ടം പൗരാവലി ആദരിക്കുന്ന ചടങ്ങായ മധുവസന്തം മൂന്നാം തിയതി വൈകിട്ട് നടക്കും. മധു അഭിനയിച്ച ചിത്രങ്ങളിലെ ഗാനങ്ങള്‍ കോര്‍ത്തിണക്കിയ ഗാനാര്‍ച്ചനയില്‍ പ്രശസ്ത പിന്നണി ഗായകരും സംഗീതജ്ഞരും വേദിയിലെത്തും.