ബംഗളുരു: ബി.ജെ.പിയുടെ ചലോ മംഗളുരു റാലി തടയുന്നതിന്റെ ഭാഗമായി മൂന്ന് ദിവസത്തെ നിരോധനാജ്ഞ പ്രഖ്യാപിച്ച് ബംഗളുരു പൊലിസ്. ബി.ജെ.പി പ്രവര്‍ത്തകര്‍ക്കെതിരേ സംസ്ഥാനത്തുടനീളം അരങ്ങേറുന്ന അക്രമങ്ങളില്‍ പ്രതിഷേധിച്ചാണ് റാലി.
ബംഗളുരുവിലെ ഫ്രീഡം പാര്‍ക്കില്‍ നൂറു കണക്കിന് പൊലിസ് ഉദ്യോഗസ്ഥരെയാണ് റാലി തടയുന്നതിനായി വിന്യസിച്ചിരിക്കുന്നത്. റാലിക്ക് പൊലിസ് അനുമതി നിഷേധിച്ചിരുന്നുവെങ്കിലും ബി.ജെ.പി നേതാക്കള്‍ യോഗം ചേര്‍ന്ന് റാലിക്ക് അനുമതി നല്‍കണമെന്ന് സംസ്ഥാന ആഭ്യന്തര മന്ത്രിയോട് നിര്‍ദേശിക്കുകയായിരുന്നു. അതിനിടെ റാലിക്ക് പൊലിസ് അനുമതി നല്‍കിയിട്ടില്ലെന്നും സംഘര്‍ഷം ഒഴിവാക്കാനാണ് അനുമതി നിഷേധിച്ചതെന്നും ബംഗളുരു പൊലിസ് ഡി.സി.പരി ഹനുമന്തരായ മാധ്യമങ്ങളോട് പറഞ്ഞു.
റാലിയില്‍ പങ്കെടുക്കാനെത്തുന്ന ഒരാളെപ്പോലും നഗരത്തില്‍ പ്രവേശിപ്പിക്കില്ലെന്നും അദ്ദേഹം വ്യക്തമാക്കി. സിദ്ധരാമയ്യയുടെ കോണ്‍ഗ്രസ് സര്‍ക്കാരിനോട് ഏറ്റുമുട്ടലിനൊരുങ്ങിയിരിക്കുന്ന ബി.ജെ.പി റാലിയില്‍ നിന്നും പിന്‍മാറില്ലെന്നാണ് വിവരം. റാലിയുമായി മുന്നോട്ടുപോകാനാണ് ബി.ജെ.പിയുടെ തീരുമാനം. അതിനിടെ റാലിക്ക് അനുമതി നിഷേധിച്ചതിനെ തുടര്‍ന്ന് ബി.ജെ.പി പ്രവര്‍ത്തകരും പൊലിസും തമ്മില്‍ ഇന്നലെ ബംഗളുരു ഫ്രീഡം പാര്‍ക്കില്‍ സംഘര്‍ഷമുണ്ടായി. യുവമോര്‍ച്ചയാണ് ബംഗളുരുവില്‍ ചലോ മംഗളുരു എന്ന പേരില്‍ ബൈക്ക്‌റാലി നടത്തുന്നത്. സംസ്ഥാനത്തെ വിവിധ ജില്ലകളില്‍ നിന്നായി പ്രവര്‍ത്തകര്‍ ഫ്രീഡം പാര്‍ക്കിലെത്താനാണ് തീരുമാനം.