ന്യൂയോര്‍ക്ക്: ലോക ഒന്നാം നമ്പര്‍ താരം സ്‌പെയിനിന്റെ റാഫേല്‍ നദാല്‍, സ്വിറ്റ്‌സര്‍ലന്‍ഡ് ഇതിഹാസം റോജര്‍ ഫെഡറര്‍ എന്നിവര്‍ യു.എസ് ഓപണ്‍ ടെന്നീസിന്റെ ക്വാര്‍ട്ടറിലേക്ക് മുന്നേറി. അര്‍ജന്റീന താരം യുവാന്‍ മാര്‍ടിന്‍ ഡെല്‍ പോട്രോ, ദക്ഷിണാഫ്രിക്കന്‍ താരം കെവിന്‍ ആന്‍ഡേഴ്‌സന്‍, റഷ്യന്‍ കൗമാര താരം അന്ദ്രെ റുബ്‌ലേവ്, അമേരിക്കയുടെ സാം ക്യുറെ എന്നിവരും പുരുഷ സിംഗിള്‍സ് ക്വാര്‍ട്ടറിലെത്തിയിട്ടുണ്ട്. വനിതാ വിഭാഗത്തില്‍ അമേരിക്കന്‍ വെറ്ററന്‍ താരം വീനസ് വില്ല്യംസ്, ചെക്ക് റിപ്പബ്ലിക്ക് താരങ്ങളായ ലോക ഒന്നാം നമ്പര്‍ കരോലിന പ്ലിസ്‌കോവ, പെട്ര ക്വിറ്റോവ എന്നിവരും ക്വാര്‍ട്ടറിലെത്തി. അതേസമയം വിലക്ക് മാറി വൈല്‍ഡ് കാര്‍ഡ് എന്‍ട്രിയുമായി തിരിച്ചെത്തി മികച്ച മുന്നേറ്റം നടത്തിയ റഷ്യയുടെ മരിയ ഷറപ്പോവ പ്രീ ക്വാര്‍ട്ടറില്‍ പരാജയപ്പെട്ട് പുറത്തായി.
പ്രീ ക്വാര്‍ട്ടറില്‍ അനായാസ വിജയങ്ങള്‍ നേടിയാണ് ഫെഡററും നദാലും ക്വാര്‍ട്ടറിലേക്ക് കടന്നത്. ഫെഡറര്‍ ജര്‍മന്‍ താരം കോഹിഷ്‌റിബറിനെ മൂന്ന് സെറ്റ് നീണ്ട ഏകപക്ഷീയ പോരില്‍ മറികടന്നു. സ്‌കോര്‍: 6-4, 6-2, 6-5. ഉക്രൈന്‍ താരം അലക്‌സാണ്ടര്‍ ഡോല്‍ഗോപൊലോവിനെ കീഴടക്കിയാണ് നദാലിന്റെ മുന്നേറ്റം. സ്‌കോര്‍: 6-2, 6-4, 6-1. ഡൊമിനിക്ക് തീമിനെതിരേ കടുത്ത പോരാട്ടം അതിജീവിച്ചാണ് ഡെല്‍ പോട്രോയുടെ വിജയം. സ്‌കോര്‍: 1-6, 2-6, 6-1, 7-6 (7-1), 6-4. ക്വാര്‍ട്ടറില്‍ ഫെഡറര്‍- ഡെല്‍ പോട്രോ പോരാട്ടം അരങ്ങേറും.
വനിതാ പ്രീ ക്വാര്‍ട്ടറില്‍ അമേരിക്കന്‍ താരം ബ്രാഡിയെ അനായാസം വീഴ്ത്തിയാണ് ഒന്നാം നമ്പര്‍ താരം പ്ലിസ്‌കോവയുടെ മുന്നേറ്റം. സ്‌കോര്‍: 6-1, 6-0. ക്വിറ്റോവ സ്പാനിഷ് താരം ഗര്‍ബിനെ മുഗുരുസയെ 7-6 (7-3), 6-3 എന്ന സ്‌കോറിന് പരാജയപ്പെടുത്തി. വെറ്ററന്‍ താരം വീനസ് വില്ല്യംസ് സ്പാനിഷ് താരം സുവാരസ് നവരോയെ 6-3, 3-6, 6-1 എന്ന സ്‌കോറിനാണ് വീഴ്ത്തിയത്.