വാഷിങ്ടണ്‍: 7,000 ഇന്ത്യക്കാരുള്‍പ്പെടെ എട്ടുലക്ഷം കുടിയേറ്റക്കാരെ ബാധിക്കുന്ന വിവാദനിയമവുമായി ട്രംപ് രംഗത്ത്. ഒബാമ ഭരണകൂടം നടപ്പില്‍ വരുത്തിയ ഡി.സി.എ (ഡിഫേര്‍ഡ് ആക്ഷന്‍ ഫോര്‍ ചൈല്‍ഡ്ഹുഡ് ) നിയമം നിര്‍ത്തലാക്കി ട്രംപ് ഉത്തരവു പുറപ്പെടുവിച്ചു. കുട്ടികളായിരിക്കെ രേഖകളില്ലാതെ അമേരിക്കയിലെത്തിയവര്‍ക്ക് പിന്നീട് നിയമപരിരക്ഷ നല്‍കപ്പെടുന്ന പദ്ധതിയാണ് ഡി.എ.സി.എ. ട്രംപിന്റെ തീരുമാനത്തിനെതിരേ ശക്തമായ പ്രതിഷേധമാണ് യു.എസില്‍ ഉയര്‍ന്നിരിക്കുന്നത്.
യു.എസില്‍ മതിയായ രേഖകളില്ലാതെ കഴിയുന്ന കുടിയേറ്റക്കാരെ ലക്ഷ്യമിട്ടാണ് പുതിയ നടപടി. യു.എസിലേക്ക് കുടിയേറിയവരുടെ കുട്ടികളെയാണ് ഈ നിയമം കൂടുതലായും ബാധിക്കുക. അധികാരത്തിലെത്തിയാല്‍ ഡി.സി.എ റദ്ദാക്കുമെന്ന് ട്രംപ് തെരഞ്ഞെടുപ്പ് വേളയില്‍ പ്രഖ്യാപിച്ചിരുന്നു.
നിയമം റദ്ദാക്കുന്ന കാര്യം യു.എസ് അറ്റോര്‍ണി ജനറല്‍ ജെഫ് സെഷനാണ് അറിയിച്ചത്. രാജ്യത്തേക്ക് എല്ലാ വിഭാഗം ആളുകള്‍ക്കും ആനുകൂല്യങ്ങള്‍ നല്‍കുന്ന പദ്ധതി അമേരിക്കന്‍ ജനത നിരസിച്ചതാണ്. അഭയാര്‍ഥികളെ ഓരോ വര്‍ഷവും സ്വീകരിക്കുന്നതില്‍ പരിധി പുതിയ നിയമത്തിലൂടെ സാധ്യമാവുമെന്ന് സെഷന്‍ പറഞ്ഞു.
മുന്‍ പ്രസിഡന്റ് ഒബാമയാണ് 2012ല്‍ ഡി.സി.എ നിയമം കൊണ്ടുവന്നത്. അതേസമയം ട്രംപിന്റെ തീരുമാനത്തിനെതിരേ നിരവധി പേര്‍ രംഗത്തെത്തി. നിയമം റദ്ദാക്കിയത് ക്രൂരമായ നടപടിയാണെന്ന് ഒബാമ പറഞ്ഞു. റിപ്പബ്ലിക്കന്‍ പാര്‍ട്ടിയിലെ ചില അംഗങ്ങളും ട്രംപിനെതിരേ രംഗത്തുവന്നിട്ടുണ്ട്. വൈറ്റ് ഹൗസിന്റെ സമീപത്തായി നൂറുകണക്കിന് പേര്‍ പുതിയ തീരുമാനത്തിനെതിരേ രംഗത്തുവന്നു.