മഞ്ചേരി: മഞ്ചേരി മെഡിക്കല്‍ കോളജ് പരിസരത്ത് സി.എച്ച് സെന്ററിനായിി നിര്‍മിച്ച പുതിയ അഞ്ചുനില കെട്ടിടം പാണക്കാട് സയ്യിദ് ഹൈദരലി ശിഹാബ് തങ്ങള്‍ നാടിനു സമര്‍പ്പിച്ചു. സൗജന്യ നിരക്കില്‍ പ്രവര്‍ത്തിക്കുന്ന 12 ഡയാലിസിസ് മെഷീനുകള്‍, ലാബ്, മെഡിക്കല്‍ സ്റ്റോര്‍, ആംബുലന്‍സ്, പ്രാര്‍ഥനാ മുറികള്‍, മെഡിക്കല്‍ കോളജിലെ രോഗികള്‍ക്കായി അടുക്കളയോടെയുള്ള ഭക്ഷണഹാള്‍ തുടങ്ങി വിപുലമായ സൗകര്യങ്ങളോടെയാണ് കെട്ടിടം സജ്ജീകരിച്ചിരിക്കുന്നത്.
സി.എച്ച് സെന്ററിനു സ്വന്തം കെട്ടിടമെന്ന സ്വപ്നം സാക്ഷാല്‍ക്കരിക്കപ്പെട്ടതോടെ കൂടുതല്‍ അശരണരുടെ കണ്ണീരൊപ്പാന്‍ സാധിക്കുമെന്നു ഹൈദരലി ശിഹാബ് തങ്ങള്‍ പറഞ്ഞു. അഡ്വ. യു.എ ലത്വീഫ് അധ്യക്ഷനായി. കെട്ടിടത്തിലെ കെ.എം.സി.സി ഹാള്‍ പി.കെ കുഞ്ഞാലികുട്ടി എം.പിയും ലാബ് പ്രതിപക്ഷ നേതാവ് രമേശ് ചെന്നിതലയും ഫാര്‍മസി മുന്‍ മുഖ്യമന്ത്രി ഉമ്മന്‍ചാണ്ടിയും ഡയാലിസിസ് സെന്റര്‍, പ്രാര്‍ഥനാ ഹാള്‍ എന്നിവ പാണക്കാട് സയ്യിദ് സ്വാദിഖലി ശിഹാബ് തങ്ങളും ഉദ്ഘാടനം ചെയ്തു. മുസ്‌ലിംലീഗ് സംസ്ഥാന ജനറല്‍ സെക്രട്ടറി കെ.പി.എ മജീദ്, ഇ.ടി മുഹമ്മദ് ബഷീര്‍ എം.പി, പി.വി അബ്ദുല്‍വഹാബ് എം.പി, ഡോ. എം.കെ മുനീര്‍, എം.പി അബ്ദുസ്സമദ് സമദാനി, അഡ്വ. എം. ഉമ്മര്‍, എ.പി അനില്‍കുമാര്‍, പി.കെ അബ്ദുര്‍റബ്ബ്, പി. ഉബൈദുല്ല, പി.കെ ബഷീര്‍, പി. അബ്ദുല്‍ ഹമീദ് സംസാരിച്ചു.