കൊയിലാണ്ടി: ഗ്യാസ് സിലിണ്ടറിനു തീപിടിച്ചു ചായക്കട കത്തിനശിച്ചു. കൊല്ലം ബീച്ച് റോഡിലുള്ള ചുള്ളിയില്‍പറമ്പില്‍ മറുവയില്‍ താമസിക്കുന്ന അബ്ദുറഹ്മാന്റെ ഉടമസ്ഥതയിലുള്ള ക്ഷമ ടീസ്റ്റാളാണ് അഗ്നിക്കിരയായത്.
ഇന്നലെ വൈകിട്ടു നാലിനാണ് അപകടം നടന്നത്. പലഹാര നിര്‍മാണം നടക്കുന്നതിനിടയില്‍ ഗ്യാസ് സ്റ്റൗവില്‍ നിന്നു തീ പടരുകയായിരുന്നു. വടകരയില്‍ നിന്നും പേരാമ്പ്രയില്‍ നിന്നും അഗ്നിശമനസേന എത്തിയാണു തീയണച്ചത്.
അപകടം നടന്നയുടന്‍ സമീപത്തുള്ള മത്സ്യമാര്‍ക്കറ്റിലെ തൊഴിലാളികളും നാട്ടുകാരും ചേര്‍ന്നു തീപിടിച്ച സിലിണ്ടര്‍ പുറത്തേക്കെത്തിച്ചു തീയണച്ചതിനാല്‍ വന്‍ ദുരന്തമൊഴിവായി.
കടയിലെ ഫര്‍ണിച്ചറും മറ്റു സാധനസാമഗ്രികളും പൂര്‍ണമായും അഗ്നിക്കിരയായി. 50,000ത്തിലധികം രൂപയുടെ നഷ്ടം കണക്കാക്കുന്നു.